الماتىدا ەسكى ءۇي تۇرعىندارىنا جاڭا باسپانا بەرىلمەك

الماتى. قازاقپارات - الماتى اكىمدىگى ەسكى تۇرعىن ۇيلەردىڭ تۇرعىندارىن كوشىرۋ تۋرالى ماسەلەنى قاراستىرىپ جاتىر، دەپ حابارلايدى قازاقپارات ءتىلشىسى.

قالا قۇرىلىسىن باقىلاۋ باسقارماسىنىڭ حابارلاۋىنشا، بۇل تۇرعىنداردىڭ باسپاناسىن ارنايى كوميسسيا «ەسكىرگەن» دەگەن قورىتىندى شىعارعان. اكىمدىك قازىر ءبىر قۇرىلىس كومپانياسىمەن كەلىسسوز جۇرگىزىپ جاتىر. بۇل كومپانيا جاقىندا تۇركسىب اۋدانىندا سەيفۋللين داڭعىلىنا جاقىن جەردە تۇرعىن ءۇيدىڭ قۇرىلىسىن باستايدى. وتكەن عاسىردىڭ ورتاسىندا سالىنعان ۇيدە تۇرىپ جاتقان تۇرعىنداردىڭ ەندى اۋدانى كەڭىرەك جاڭا باسپانا الۋعا مۇمكىندىگى بار.

«60-70 جىل بۇرىن سالىنعان ۇيلەردىڭ شارشى مەترى قازىرگى نورماعا ساي كەلمەيدى. ەڭ كىشكەنتاي پاتەردە تۇرىپ جاتقان تۇرعىندار 15 شارشى مەترگە ارتىق باسپانا الا الادى. ەگەر، تۇرعىندار بۇدان ۇلكەنىرەك باسپانا العىسى كەلسە، وندا قۇرىلىس كومپانياسىمەن كەلىسۋى كەرەك» ، - دەدى الماتى اكىمىنىڭ ورىنباسارى مۇحيت ازىربايەۆ.

اكىمنىڭ ورىنباسارى الاتاۋ اۋدانىندا «نۇرلى جەر» باعدارلاماسى بويىنشا سالىنىپ جاتقان 23 ءۇيدىڭ اباتتاندىرىلۋ پروتسەسىمەن تانىستى. ايتا كەتۋ كەرەك، قازاقستاندا سپورت الاڭقايلارىنا قۇرال- جابدىق شىعاراتىن كومپانيالاردىڭ سانى ارتىپ كەلەدى. وسىنداي ءوندىرىس ورىندارىنىڭ ءبىرى الماتىدا ورنالاسقان.