الماتىدا ەر ادام دەزينفەكتسيا جاساپ جۇرگەن جۇمىسشىعا پىشاق الا جۇگىرگەن

الماتى. قازاقپارات - الماتىدا دەزينفەكتسياشىعا شابۋىل جاساعان ماس ەر ادامعا قاتىستى پوليتسيا تۇسىنىك بەردى، دەپ حابارلايدى قازاقپارات ءتىلشىسى.

بەينەجازبا الەۋمەتتىك جەلىلەردە پايدا بولدى. وندا ماس ادام «پرەمەرا» تۇرعىن ءۇي كەشەنىندە دەزينفەكتسيا جاساپ جۇرگەن جۇمىسشىنى پىشاقپەن قۋىپ ءجۇر دەلىنگەن.

قالالىق پ د باسپا ءسوز قىزمەتىنىڭ مالىمەتىنشە، اتالعان فاكت كەشە كۇندىز ناۋرىزباي اۋدانىنىڭ اۋماعىندا ورىن العان.

«بەلگىلى بولعانداي، جانجال دەزينفەكتسيا قىزمەتىنىڭ جۇمىسشىسى مەن وسى شاعىناۋدان تۇرعىنىنىڭ اراسىندا تۋىنداعان. ەر ادام ماس بولعان. بۇل فاكتى بويىنشا «102» پۋلتىنە حابارلاما تۇسكەن جوق. ءبىز ونى الەۋمەتتىك جەلىلەردەن بىلدىك. قازىر ەكى تاراپتا انىقتالىپ، پوليتسيا بولىمشەسىنە جەتكىزىلدى. دەزينفەكتسياشى ونىڭ ۇستىنەن ارىز تۇسىرگەن جوق. سونداي-اق، ونىڭ قولىندا پىشاق بولعانىن راستامادى»، - دەيدى پوليتسيا وكىلى.

پوليتسيانىڭ مالىمەتىنشە، ىشىمدىك ىشكەن ادامنىڭ ۇستىنەن پاتەر يەلەرى كووپەراتيۆى ءتوراعاسى شاعىم ءتۇسىردى.

«ق ر اكىمشىلىك قۇقىق بۇزۋشىلىق تۋرالى كودەكسىنىڭ 434-بابى (ۇساق بۇزاقىلىق) بويىنشا اكىمشىلىك حاتتاما جاسادىق. ءىس ماتەريالدارى شەشىم قابىلداۋ ءۇشىن سوتقا جىبەرىلەدى»، - دەپ تولىقتىردى ۆەدومستۆودان.