قازالىدا اباي شىعارمالارىن تۇگەلدەي جاتقا بىلەتىن وقۋشى تۇرادى

قىزىلوردا. قازاقپارات - قىزىلوردا وبلىسى قازالى اۋدانىنىڭ ورتالىعى - ايتەكە ءبي كەنتىندە تۇراتىن وقۋشى اياۋلىم ازەننىڭ ەستە ساقتاۋ قابىلەتى ەرەكشە.

ول ابايدىڭ 45 قارا ءسوزىن، 200 دەن استام ولەڭى مەن 3 پوەماسىن جاتقا بىلەدى، دەپ حابارلايدى قازاقپارات ءتىلشىسى.

بۇگىندە اياۋلىم ازەن توعىزىنشى سىنىپتا وقيدى. بالا كەزىنەن ول اباي ولەڭدەرىن جاتتاۋعا قۇمارتقان. وعان اكەسى جەڭىسبەك ارالبايەۆ اسەر ەتكەن.

سودان بەرى اياۋلىم قازاقتىڭ ۇلى اقىنىنىڭ شىعارمالارىنا قىزىعۋشىلىعى ارتىپ، ونىڭ بۇكىل شىعارماشىلىعىن جاتتاپ الۋعا كوڭىل بولگەن. سونداي-اق، اياۋلىمنىڭ ەسەپكە دە جۇيركىتىگى بايقالادى. ونىڭ ۇستازى مايرا وماروۆا شاكىرتىنىڭ وتە ۇقىپتى ەكەنىن جەتكىزدى.

اباي شىعارمالارىن باستان-اياق جاتتاپ الۋ - ەكى ادامنىڭ ءبىرىنىڭ قولىنان كەلە بەرمەيتىن قاسيەت. ونىڭ ايتۋىنشا، ابايدىڭ ولەڭدەرىن جاتتاۋدا مەن ءوز ادىسىنە سۇيەنەدى.

ەڭ باستى نازاردا ۇستاناتىنى - ءاربىر ولەڭنىڭ، ءاربىر شىعارمانىڭ مازمۇنىنا تەرەڭ ءۇڭىلىپ، ونى زەردەمە توقۋ.

«عۇلامانىڭ شىعارمالارىن وقىعان سايىن مەنىڭ جان-دۇنيەم بايىپ، رۋحاني مول قازىناعا يە بولامىن. مەن بالا كەزىمنەن وقۋعا كوڭىل ءبولىپ، ءبىلىم الۋعا اۋەس بولدىم. وسى ارقىلى مەن بىلىكتى مامان اتانىپ، ەلگە قىزمەت ەتكىم كەلەدى»، - دەدى اياۋلىم...

اياۋلىم ابايدىڭ قارا سوزدەرىن جاتقا ايتۋشىلار اراسىنداعى رەسپۋبليكالىق بايققاۋدا ءۇشىنشى ورىن العان. بىلتىر «Qazaq Epos» رەسپۋبليكالىق اعارتۋ جوباسى «تۇلپار ءمىنىپ، تۋ العان!» بايقاۋىندا دا قوبىلاندى باتىر جىرىن جاتتاۋشىلار ورەندەر اراسىندا جەڭىمپازدار قاتارىنان كورىندى.

اكەسى جەڭىسبەك ارالبايەۆتىڭ ايتۋىنشا، مەكتەپ تابالدىرىعىن اتتاعاننان كەيىن بارلىق ساباققا جاقسى قابىلەتىن كورسەتىپ، وزات وقۋشى اتانىپ ۇلگەرگەن. زەرەك قىز ابايدىڭ ولەڭدەرىن العاشقىدا ءبىر-ەكى شۋماقتان زەردەسىنە توقىسا، ودان كەيىن ولەڭدى تولىعىمەن جاتتايتىن جاعدايعا جەتتى.

«اياۋلىم - قىزدارىمنىڭ تۇڭعىشى. ءار اتا-انا بالاسىنىڭ جەتىستىككە جەتكەنىن، بيىكتەردەن كورىنگەنىن قالايدى. مەن دە قىزىمنىڭ ساباققا دەگەن ىنتاسىن ارتتىرۋ ماقساتىندا كوپ قاداعالادىم. ادەپكىدە ماتەماتيكاعا دەگەن قۇشتارلىعىن ەسكەرىپ، وسى باعىتتاردا جۇمىس جاسادىق. ودان كەيىن، اباي اتامىزدىڭ ولەڭدەرىنە دەن قويعىزدىم. ولەڭ-جىر كەز كەلگەن جانعا جىگەر مەن شابىت سىيلايدى. ەستە ساقتاۋ قابىلەتىن دە ارتتىراتىنى تاعى بار»، - دەدى اكەسى جەڭىسبەك ارالبايەۆ.