سۋ تاسقىنى بولعان ەلدىمەكەندەردە مالدىڭ ولەكسەسىن جەيتىن شيبورىلەر كوبەيگەن

ماقتاارال. قازاقپارات - ماقتاارال اۋدانىنداعى توپان سۋ باسقان ەلدىمەكەندەردە بالىق اۋلاۋعا تىيىم سالىندى.

بۇل تۋرالى تۇركىستان وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ بالىق شارۋاشىلىعى ءبولىمىنىڭ باسشىسى شاكەن بورانباي ءمالىم ەتتى، حابارلايدى قازاقپارات ءتىلشىسى.

شاكەن بورانبايدىڭ ايتۋىنشا، بالىقتىڭ جاپپاي قىرىلۋىن بولدىرماۋ جانە ولاردى قۇتقارۋ ماقساتىندا سارقىندى سۋدى كانالدارعا قۋۋ جۇمىستارى جۇرگىزىلۋدە. قازىردىڭ وزىندە ماماندار 8767 تەكشە مەتر سۋدى كانالدارعا جىبەرىپ ۇلگەرگەن.

بۇگىندە وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ ماماندارى سۋ باسقان اۋىلداردا تاۋلىك بويى جۇمىس ىستەۋدە. باستى ماقسات - تۇرعىنداردىڭ بالىق اۋلاۋىنا تىيىم سالىپ، ۋلانۋ فاكتىلەرىنىڭ الدىن الۋ بولىپ وتىر.

«ءبىز 12- مامىر كۇنى سۋ باسقان ەلدىمەكەندەردەگى بالىقتاردىڭ جارامدىلىعىن انىقتاۋ ماقساتىندا 3 دانا سازاندى ۆەتەريناريالىق باقىلاۋ جانە قاداعالاۋ كوميتەتىنىڭ ماقتاارال اۋداندىق اۋماقتىق ينسپەكتسياسى زەرتحاناسىنا جولدادىق. بۇدان بولەك، 3 دانا سازان مەن 1 دانا ءدوڭماڭداي بالىعىن شىمكەنت قالالىق تاۋارلار مەن كورسەتىلەتىن قىزمەتتەردىڭ ساپاسىن قاداعالاۋ باسقارماسىنا دا جونەلتتىك. ساراپتاما قورىتىندىسى الداعى اپتادا دايىن بولادى. سوعان دەيىن تۇرعىنداردىڭ سارقىندى سۋدان بالىق اۋلاۋىنا تىيىم سالىنادى»، - دەيدى شاكەن بورانباي.

سونىمەن قاتار اپات بولعان ايماقتا ءۇي جانۋارلارىنىڭ ولەكسەسى كوبەيۋىنە بايلانىستى شيبورىلەردىڭ سانى كوبەيگەن. وسىعان وراي ق ر اۋىل شارۋاشىلىعى ءمينيسترىنىڭ 2017-جىلعى 5- جەلتوقسانداعى «جانۋارلاردىڭ سانىن رەتتەۋ قاعيدالارىن بەكىتۋ تۋرالى» 480№ بۇيرىعىنا سايكەس تەگىس ۇڭعىلى 12 كاليبرلى اڭشى قارۋى ازىرلەنىپ، 45 مىڭ تەڭگەگە 300 دانا وق-ءدارى ساتىپ الىنعان. قازىرگى ۋاقىتتا وسى اۋىلدارداعى ءشيبورىنىڭ سانىن انىقتاۋ جۇمىستارى جۇرگىزىلۋدە.

ولجالانعان شيبورىلەر اۋداندىق ۆەتەريناريا بولىمشەسىنە وتكىزىلەتىن بولادى.