زەرتحانا قىزمەتكەرلەرىنە ۇستەمەاقى تولەۋ ەرەجەسىن وزگەرتۋ قاجەت - ەلجان ءبىرتانوۆ

نۇر-سۇلتان. قازاقپارات - ق ر دەنساۋلىق ساقتاۋ ءمينيسترى ەلجان ءبىرتانوۆ زەرتحانا قىزمەتكەرلەرىنە ۇستەمەاقى تولەۋ ەرەجەسىن وزگەرتۋدى ۇسىندى، دەپ حابارلايدى قازاقپارات.

«كەي ادامدار دەمالىپ جاتقاندا، مەديتسينالىق قىزمەتكەرلەر ەڭبەك ەتۋدە. بۇگىن ۇلتتىق ساراپتاما ورتالىعىنىڭ ايماقتىق ۆيرۋسولوگيالىق زەرتحاناسىنا باردىم. مۇندا تاۋلىك بويى جۇمىس ىستەپ، كوروناۆيرۋس ينفەكتسياسىنا سىناما الاتىن تاجىريبەلى ۆيرۋسولوگتار مەن زەرتحانا ماماندارى جۇمىس ىستەيدى. كۇن سايىن قالا ەمحانالارىنان، جەدەل جاردەمنەن جانە اسكەري بولىمشەلەردەن الىنعان پ ت ر تەست سىنامالارى وسىندا جەتكىزىلەدى»، - دەپ جازدى مينيستر Facebook جەلىسىندە.

مينيستر COVID-19 ەپيدەمياسى باستالعاندا مامانداردىڭ تاۋلىگىنە 600 تەست جاساعانىن، ال قازىر - 2 مىڭنان استام تەست جاسايتىنىن اتاپ ءوتتى.

بارلىق دەرەكتەر زەرتحانالىق اقپاراتتىق جۇيەگە ەنگىزىلەدى. ەپيدەميانى باسقارۋدى اۆتوماتتاندىرۋ ءۇشىن بۇل جۇيەنى اۋرۋحانالار مەن ەمحانالاردىڭ اقپاراتتىق جۇيەلەرىمەن بىرىكتىرۋ جۇمىستارى ءجۇرىپ جاتىر.

«ۇجىممەن كەزدەسىپ، ۇستەمەاقى تولەۋ ماسەلەسىن تالقىلادىق. زەرتحانا قىزمەتكەرلەرىنە ەڭبەكاقى تولەۋ ەرەجەلەرىن وزگەرتۋ قاجەت دەپ ۇيعاردىق. سەبەبى، ولار دا ىقتيمال ناۋقاستارمەن جانە بيوسىنامالارىمەن ەتەنە جۇمىس ىستەيدى.

سىزدەردىڭ كاسىبيلىكتەرىڭىز بەن ەرەن ەڭبەكتەرىڭىز ءۇشىن راحمەت!»، - دەدى ە. ءبىرتانوۆ.