قازاقستاندا جاتىر موينى وبىرىنا قارسى ۆاكتسيناتسيالاۋ شاراسى جۇرگىزىلمەك
مينيسترلىكتىڭ Facebook پاراقشاسىندا وتكەن ونلاين كەزدەسۋ بارىسىندا ماماندار ادامداعى پاپيللوما ۆيرۋسىنا، جاتىر موينى وبىرىنا قارسى ۆاكتسينا ماسەلەلەرىن تالقىلادى، دەپ حابارلايدى قازاقپارات.
«ءبىز اتالعان ۆاكتسينانى قولدانۋدىڭ حالىقارالىق تاجىريبەسىن تالقىلاپ، جاتىر موينى وبىرىن زەرتتەۋ بويىنشا وتكىزگەن سكرينينگىمىزدىڭ ناتيجەلەرى جايىندا ءسوز قوزعاماقپىز. بۇل ۆاكتسينانى 2021-جىلعى ۇلتتىق ۆاكتسينا كۇنتىزبەسىنە قوسۋدى جوسپارلاپ وتىرمىز. ول اتا-انالارى تاراپىنان تولىق كەلىسىم بولعان جاعدايدا قىز بالالارعا ەرىكتى تۇردە ەگىلەتىن بولادى»، - دەدى كەزدەسۋدى اشقان ۆيتسە-مينيستر.
تالقىلاۋعا قاتىسقان ق ر ۇ ع ا كوررەسپوندەنت مۇشەسى، مەديتسينا عىلىمدارىنىڭ دوكتورى، پروفەسسور ۆياچەسلاۆ لوكشيننىڭ دەرەگىنشە، بۇگىندە الەمدە جىل سايىن شامامەن 600 مىڭ جاتىر موينى وبىرى تىركەلىپ جاتادى. ول وبىر جاعدايلارىنىڭ اراسىندا ءتورتىنشى ورىندا تۇر. سونىمەن قاتار، جىل سايىن ءدال وسى جامان اۋرۋدان الەمدە 300 مىڭ ايەل كوز جۇمادى.
«قازىرگى ۋاقىتتا جاتىر موينى وبىرىن تومەندەتۋدىڭ وڭ وڭتايلى جولى - بۇل ۆاكتسينا سالۋ، سكرينينگ ادىستەمەن ەرتە دياگنوستيكالاۋ. ۆاكتسينا بىزگە نە بەرەدى؟ ول قىز بالالاردىڭ 90 پايىزىندا جاتىر موينى وبىرىنىڭ دامۋىن بولدىرماۋعا ىقپالىن تيگىزەدى. بۇعان قوسا، ءبىز كەلەسى عاسىردا جاتىر موينى وبىرى اجالىنان 62 ميلليون تاعدىردى اراشالاپ قالامىز»، - دەدى عالىم.
ال «قازاق ونكولوگيا جانە راديولوگيا عىلىمي-زەرتتەۋ ينستيتۋتى» ا ق باسقارما ءتوراعاسى، مەديتسينا عىلىمدارىنىڭ دوكتورى ديليارا قايداروۆانىڭ ايتۋىنشا، قازاقستان جاتىر موينى وبىرىنا شالدىعۋ كورسەتكىشى جوعارى ەلدەردىڭ تىزىمىنە كىرەدى. ەلىمىزدەگى بۇل كورسەتكىش 18,7 پايىزدى قۇراپ وتىر.
«سوڭعى 15 جىلدا جاتىر موينى وبىرىنا شالدىعۋ دەرەگىنىڭ ارتقانى بايقالعانىمەن اۋرۋدىڭ بۇل تۇرىنەن ءولىم-ءجىتىم تومەندەگەن. 10 جىلدا قازاقستاندا جاتىر موينى وبىرىنا سكرينينگ جۇرگىزىلىپ كەلەدى جانە وبىردىڭ العاشقى ساتىسىن انىقتاۋ 62 پايىزعا دەيىن جەتتى. 2008-جىلدان بەرى سكرينينگ وتكىزىپ كەلەمىز. بۇگىندە ايەلدەر كەز كەلگەن جاسىندا تەست تاپسىرا الادى. قازاقستاندا جىل سايىن 600 دەن استام ايەل جاتىر موينى وبىرىنان كوز جۇمادى. ياعني، كۇن سايىن 2 ايەل قايتىس بولادى دەگەن ءسوز. سوندىقتان قازىرگى ۋاقىتتا جۇرگىزىلىپ جاتقان باعدارلاما وسىناۋ قاتەرلى اۋردىڭ الدىن الۋعا سەپتىگىن تيگىزەدى»، - دەدى ديليارا قايداروۆا.
