تۇركىستان قالاسىندا ەرەكشە دەندروساياباق سالىنىپ جاتىر
بوي كوتەرگەن عيماراتتاردىڭ ىشكى ارلەۋ جانە اباتتاندىرۋ جۇمىستارى ءجۇرىپ جاتىر، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سلىتەمە جاساپ.
ايماق باسشىسى بارلىق دەمالىس ورىندارىنا ساپالى گازون توسەۋدى تاپسىردى. سونداي-اق، ساياباقتارداعى دەمالاتىن جايلاردى جەڭىل دە قولايلى كونسترۋكتسيادان ورناتۋدى جۇكتەدى.
قۇرىلىسى اياقتالعان دەپارتامەنتتەر مەن باسقارمالار ۇيىندە ىشكى ارلەۋ جۇمىستارى جۇرۋدە.
اكىمشىلىك-ىسكەرلىك ورتالىقتا ورنالاسقان عيماراتتارمەن بىركەلكى ديزايندا جاسالعان نىساننىڭ ىشكى كەلبەتى دە زاماناۋي جاساقتالعان. ءومىرزاق ەستاي ۇلى قالا ىرگەسىندە ورنالاسقان دەندروباق قۇرىلىسىنىڭ باسىندا بولدى.
28 گەكتار القاپتى الىپ جاتقان جاسىل اۋماقتا سان ءتۇرلى جەمىس اعاشتارى مەن كوپجىلدىق وسىمدىك تۇرلەرى وسىرىلەدى.
مۇندا امفيتەاتر، سۋبۇرقاقتار مەن جاساندى كوپىرلەر سالىنادى. وبلىس باسشىسى بىرەگەي جوباعا جاۋاپتى باسشىلارعا قۇرىلىسشىلار سانىن ارتتىرۋدى تاپسىردى.
«قۇرىلىستا ادام سانى از. اقشا بولىنگەننەن كەيىن ايانباي، كۇندىز-ءتۇنى جۇمىس ىستەۋ كەرەك. الدىمەن اعاشتاردى سۋارۋ جۇيەسىن رەتتەڭىزدەر. جاساندى كول كولەمىن ارتتىرۋ كەرەك. ەڭ باستىسى، بالالار الاڭقايىنداعى قۇرىلىستىڭ ساپاسى مەن قاۋىپسىزدىگىنە باسا نازار اۋدارىلسىن»، - دەدى وبلىس اكىمى.
سونىمەن قاتار، ءومىرزاق شوكەيەۆ نۇرسۇلتان الاڭى، اتتراكتسيوندار ساياباعى، ياساۋي مۇراجايى، تۇڭعىش پرەزيدەنت ساياباعى مەن جەلىلىك ساياباقتى ارالادى. اباتتاندىرۋ مەن كوگالداندىرۋ جۇمىستارىنىڭ بەكىتىلگەن كەستەگە ساي اياقتالۋىن مىندەتتەدى.
