وسكەمەندەگى اۆتوكولىك قۇراستىرۋ زاۋىتى جابىلۋى مۇمكىن
بۇل تۋرالى كاسىپورىن وكىلدەرى رەسمي مالىمدەدى. ولاردىڭ ايتۋىنشا، وسىعان دەيىن زاۋىتقا ۇكىمەت تاراپىنان قارجىلاي قولداۋ كورسەتىلىپ كەلگەن. ەندى سول جەڭىلدىكتەر تىيىلادى.
وسكەمەندە جىلىنا 120 مىڭ اۆتوكولىك شىعاراتىن تولىق سيكلدى زاۋىتتىڭ سالىنىپ جاتقانىنا 7 جىل بولىپ قالدى. الايدا ءالى دە اياقتالار ءتۇرى جوق. ءدال وسى كەلەڭسىزدىك بۇكىل اۆتوحولدينگتىڭ بولاشاعىنا كەدەرگى كەلتىرەتىن ءتۇرى بار. نەگىزى تولىق سيكلدى كەشەننىڭ باستاپقى سەحتارى وسىدان 3 جىل بۇرىن قولدانىسقا بەرىلۋى كەرەك ەدى. سول ءۇشىن اۆتوزاۋاتقا مەملەكەت تاراپىنان ايتارلىقتاي قولداۋ كورسەتىلگەن. ماسەلەن، بىرنەشە جىل قاتارىنان كاسىپورىن قوسىمشا قۇن سالىعىنان، ۋتيليزاتسيالىق الىم سىندى شىعىنداردان بوساتىلدى. الايدا ۇكىمەتتىڭ وسىنداي دەمەۋىنە قاراماستان جۇمىس ونبەگەن.
ەرجان يمانسليام، ق ر ي ي د م يندۋستريالىق دامۋ جانە ونەركاسىپتىك قاۋىپسىزدىك كوميتەتى ماشينا جاساۋ باسقارماسىنىڭ باسشىسى:
- ونەركاسىپتىك قۇراستىرۋ بويىنشا كەلىسىمشارتتار سول قۇجاتتا كورسەتىلگەن مىندەتتى ورىنداۋعا نەگىزدەلەدى. ونىڭ ءوندىرىس قارقىنىن تەجەۋگە قاتىسى جوق. بۇگىندە ءدال وسى باعىتتا بىزبەن ەشقانداي كەلىسىمشارتقا وتىرماي- اق ياعني مەملەكەتتىڭ ەشبىر قولداۋىنسىز ءوز بەتىنشە جۇمىستارىن ويداعىداي جۇرگىزىپ جاتقان كاسىپورىندار بار.
قىسقاسى، مينيسترلىكتىڭ ايتۋىنشا، زاۋىت ءوزىنىڭ قۇجاتتا كورسەتىلگەن مىندەتتەرىن ورىنداي الماعان، دەسە دە جەڭىلدىكتەردى قولدانىپ كەلگەن. ال كاسىپورىن باسشىلىعى جاڭا زاۋىت قۇرىلىسىن جەدەلدەتۋگە تىرىستىق دەيدى. سول ءۇشىن 70 ميلليون تەڭگە قاراجات بولىنگەن. 2012 -جىلى اۆتوحولدينگ تاعى دا سالىق جەڭىلدىكتەرىنە يە بولدى. دەگەنمەن قۇرىلىس مەرزىمى 2019 -جىلعا دەيىن شەگەرىلگەن. ءارى قاراي مۇلدەم تىعىرىققا تىرەلگەن.
ەرجان مانديەۆ، اۆتوحولدينگتىڭ باس ديرەكتورى:
- بۇل كەزدەرى تۇتىنۋشىلار تاراپىنان سۇرانىس تىم ازايىپ كەتەتىنىن ەشكىم بولجاعان جوق. ول كولىك نارىعىنا ۇلكەن اسەر ەتتى. 2013 -جىلدان بەرى نارىق 4 ەسە قىسقارسا، تەك وتكەن جىلى عانا 45 پروتسەنتتى قامتىپ، ءبىراز كوتەرىلدى.
جاعداي ۋشىققان ۇستىنە ۋشىعادى. وعان كولىك نارىعىنداعى سۇرانىستىڭ ءتۇسۋى، شەت ەلدىك كولىكتەردىڭ ەلگە اعىلۋى سىندى فاكتورلار ىقپال ەتتى دەيدى زاۋىت وكىلدەرى. ال بيىل الەمدىك پاندەميا ەتەكتەن تارتقان. ءسويتىپ ساۋىردە 318438 وتاندىق جاڭا كولىك تىركەۋگە الىنىپتى، بۇل وتكەن جىلمەن سالىستىرعاندا 30 پروتسەنتكە كەم. دەگەنمەن مەملەكەت اۆتوزاۋىتتى ۇنەمى قولداپ كەلدى.
وعان مىسال، 5 جىلعا ارنالعان جەڭىلدەتىلگەن اۆتونەسيەلەۋ باعدارلاماسىنىڭ جاسالۋى. ول ءۇشىن 100 ميلليارد تەڭگە قاراستىرىلعان. بيىل جىل باسىنان بەرى ونىڭ يگىلىگىن 6 مىڭعا جۋىق ادام كورىپ، سايكەسىنشە، اۆتوزاۋىتتار مەن ديللەرلەرگە 169 ميلليارد تەڭگە پايدا تۇسكەن. ال ساراپشىلار وسكەمەندەگى زاۋىتتىڭ جابىلۋى الەۋمەتتىك ماسەلەگە ۇلاسۋى مۇمكىن دەيدى. ويتكەنى ول سالادا 5 مىڭنان استام كاسىبي مامان جۇمىس ىستەيدى.
ولەگ الفيەروۆ، ساراپشى:
- ءبىز ايتىپ وتىرعان كەلىسىمشارتتتىڭ جويىلۋ- جويىلماۋىنىڭ ماڭىزى زور. ويتكەنى قانشاما مىڭداعان ادامنىڭ، كاسىبي مامانداردىڭ جۇمىسى وسىعان بايلانىستى. بولاشاقتا بۇل كاسىپورىن ءتىپتى 12 مىڭ ادامدى جۇمىسپەن قامتي الاتىن قاۋقارعا يە بولار ەدى.
قازاقستاندىق اۆتوكولىك بولشەكتەرىنىڭ تەك 33 پروتسەنتى عانا وتاندىق، كەيبىرىندە 50 پروتسەنتكە ارەڭ جەتەدى. سوندىقتان تەمىر تۇلپار قۇنى دوللار باعامىنا تاۋەلدى. ءبىراق بۇل ەلىمىزدەگى اۆتوءوندىرىس بولاشاعىنان ءۇمىت جوق دەگەندى بىلدىرمەيدى، تەك ونى جاڭعرىتۋ كەرەك دەيدى ساراپشىلار. ال سالالىق مينيسترلىك بولسا، اۆتوكونۆەيەر جۇمىسى توقتامايدى دەپ سەندىردى. ياعني وعان سالىق جەڭىلدىكتەرى قايتارىلادى تەك الدىڭعى مىندەتتەمەلەر ورىندالۋى ءتيىس.
ەرجان يمانسليام، ق ر ي ي د م يندۋستريالىق دامۋ جانە ونەركاسىپتىك قاۋىپسىزدىك كوميتەتى ماشينا جاساۋ باسقارماسىنىڭ باسشىسى:
- ولار الدارىنا قويعان مىندەتتەرىن ورىنداپ شىعۋلارى كەرەك. ەگەر بارلىعى ويداعىداي اتقارىلىپ بەلگىلەنگەن مەجەدەن شىقسا، جاڭادان كەلىسىمشارتتار جاساۋعا بولادى.
تۇيىندەسەك، وتاندىق اۆتوءوندىرىستىڭ دامۋىنا نەگىز بار. بەس جىلدى قامتيتىن «ماشينا جاساۋدى دامىتۋ باعدارلاماسىنىڭ» قابىلدانۋى وسىعان دالەل. بۇل قۇجاتتا وتاندىق كولىكتەردىڭ حالىققا قول جەتىمدى بولۋىنا باسىمدىلىق بەرىلگەن.
www.24.kz
