الماتى- سارىوزەك جولىندا جۇرگىزۋشىنى پىشاقتاپ، كولىگىن ءمىنىپ كەتكەن كۇدىكتى ۇستالدى

تالدىقورعان. قازاقپارات - الماتى وبلىسىندا كولىك جۇرگىزۋشىسىن پىشاقتاعان كۇدىكتى ۇستالدى، دەپ حابارلايدى قازاقپارات ءتىلشىسى.

الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 14 -مامىر كۇنى «الماتى- سارىوزەك» اۆتوجولىنىڭ 159-شاقىرىمىندا قاراشوقى اۋىلىنىڭ تۇسىندا جامبىل اۋدانىنىڭ تۇرعىنىنا قاراقشىلىق شابۋىل جاسالعان. جۇرگىزۋشىنى بىرنەشە رەت پىشاقتاعان كۇدىكتى ونىڭ اۆتوكولىگىن ءمىنىپ، قاشىپ كەتكەن. ءتارتىپ ساقشىلارى ءبىر تاۋلىك ىشىندە قىلمىسقا قاتىسى بار ادامدى انىقتاپ، ۇستادى.

«الماتى قالاسىنىڭ 1998 -جىلى تۋعان تۇرعىنى كۇدىككە ءىلىندى. ەڭ الدىمەن زارداپ شەگۋشىنىڭ كولىگى سارىوزەك كەنتىنىڭ ماڭىندا الدىڭعى دوڭگەلەگى جارىلعان كۇيدە تابىلدى. بىرنەشە ساعات وتكەن سوڭ قاراقشىلىق جاسادى دەگەن كۇدىككە ىلىنگەن ازامات ۇشتوبە قالاسىندا قولعا ءتۇستى. ول كىناسىن تولىق مويىندادى» ، - دەدى كەربۇلاق اۋدانى پوليتسيا ءبولىمىنىڭ باستىعى ەربول ايتقاليەۆ.

قازىرگى ۋاقىتتا ادام ولتىرۋگە وقتالۋ دەرەگى بويىنشا سوتقا دەيىنگى تەرگەۋ امالدارى جۇرگىزىلۋدە. تەرگەۋ بارىسىندا قىلمىستىڭ بارلىق ءمان- جايى انىقتالاتىن بولادى. ۇستالعان كۇدىكتى اۋداندىق پوليتسيانىڭ ۋاقىتشا ۇستاۋ يزولياتورىنا قاماققا الىندى.