ەلوردادا ماسكا تاعۋ رەجيمىن قاتاڭ ساقتاۋ كەرەك - ساۋلە قيسىقوۆا
«توتەنشە جاعداي رەجيمى توقتاسا دا، قالادا كارانتيندىك شارالار ساقتالىپ وتىر. كارانتيندىك شارالاردى الىپ تاستاۋ كەزەڭدەرى قالادا ءار جەتى كۇن سايىن اۋرۋعا شالدىعۋدىڭ ازايۋىنا قاراي ايقىندالادى. كارانتيندى الىپ تاستاۋدىڭ ناقتى داتاسىن قالا تۇرعىندارى وزدەرى انىقتايتىنىن اتاپ وتكەن ءجون. وسى ورايدا شاھار تۇرعىندارى نەگىزگى بازالىق تالاپتاردى ۇستانۋى كەرەك، ياعني ينفەكتسيانىڭ تارالۋىنا توسقاۋىل بولاتىن ەرەجەلەردى قاتاڭ ساقتاۋ قاجەت»،- دەدى س. قيسىقوۆا ونلاين باسپا ءسوز ءماسليحاتىندا.
ونىڭ اتاپ وتۋىنشە، كەيبىر ەلدەردە ينفەكتسيا وشاقتارى قايتادان شىعۋدا. وسىنىڭ سالدارىنان قايتادان كارانتين رەجيمىن كۇشەيتۋ شارالارى ءجۇرىپ جاتىر.
«ۆيرۋس ادامنان ادامعا قالاي جۇعاتىنىن تاعى دە ەسكە سالىپ وتكىم كەلەدى. ەگەر ارا قاشىقتىق ەكى مەتردەن از بولسا، ادام تۇشكىرسە نەمەسە جوتەلسە، سونداي- اق ادامنىڭ قولى كوزگ، اۋىزعا جانە مۇرىنعا ءتيىپ كەتسە، ينفەكتسيا تارالادى. سوندىقتان قاتاڭ تۇردە ماسكا تاعۋ رەجيمىن ساقتاۋ - ەڭ سەنىمدى قورعانىس»،- دەدى ساۋلە قيسىقوۆا.
