ەۋروپادا ءبىرىنشى ەل كوروناۆيرۋس ەپيدەمياسىنىڭ اياقتالعانىن جاريالادى

بريۋسسەل. قازاقپارات - سلوۆەنيا ۇكىمەتى بەيسەنبى كۇنى كەشكە رەسمي تۇردە ءوز اۋماعىندا كوروناۆيرۋس ىندەتىنىڭ اياقتالعانىن جاريالادى.

بۇل - ەۋروپا ەلدەرىنىڭ اراسىندا وسىنداي مالىمدەمە جاساعان العاشقى ەل، دەپ حابارلايدى قازاقپارات Reuters-كە سىلتەمە جاساپ.

سوڭعى ەكى اپتا ىشىندە كۇن سايىن ەلدە كوروناۆيرۋستىڭ جەتى جاڭا وقيعاسى انىقتالعان. ە و- نىڭ باسقا ەلدەرىنەن سلوۆەنياعا كەلگەن ادامدار ءساۋىر ايىنىڭ باسىنداعىداي جەتى كۇن كارانتيندە بولۋعا مىندەتتى ەمەس. يتاليامەن، اۋستريامەن، ۆەنگريامەن جانە حورۆاتيامەن شەكتەسەتىن 2 ميلليون حالقى بار ەلدە 1464 ادام كوروناۆيرۋس جۇقتىرىپ، ۆيرۋس سالدارىنان 103 ءولىم تىركەلدى.

«سلوۆەنيا سوڭعى ەكى ايدا ەپيدەميانى قىسقارتتى.. . بۇگىندە سلوۆەنيادا ەۋروپاداعى ەڭ جاقسى ەپيدەميولوگيالىق جاعداي تىركەلىپ وتىر» ، - دەپ مالىمدەدى پرەمەر- مينيستر يانەز يانشا.

ەپيدەميانىڭ اياقتالۋىنا بايلانىستى كوروناۆيرۋستان زارداپ شەككەن ازاماتتار مەن كومپانيالارعا كورسەتىلەتىن قارجىلاي كومەك تە مامىردىڭ سوڭىندا بىتەدى. ۇكىمەت كوروناۆيرۋس ينفەكتسياسى بەلگىلەرى بار شەتەل ازاماتتارىنىڭ ەلگە كىرۋگە تىيىم سالىناتىنىن ءمالىم ەتتى. ازاماتتار بۇرىنعىشا ينفەكتسيانىڭ تارالۋىنىڭ الدىن الۋ ءۇشىن نەگىزگى ەرەجەلەردى ساقتاۋى ءتيىس. ادامدار جابىق قوعامدىق ورىندارعا ماسكا تاعىپ، ءبىر- بىرىنەن 1,5 مەتر قاشىقتىقتى ساقتاۋى ءتيىس جانە قولدارىنا دەزينفەكتسيا جاساۋعا مىندەتتى.