باس ءمۇفتي مەشىتكە كەلەتىن جاماعاتقا ۇندەۋ تاستادى
«اللا قالاسا 18- مامىردا جەكە قۇلشىلىق جاساپ، قۇران وقىتىپ، نەكە قيدىرۋعا نيەت بىلدىرگەن ازاماتتار ءۇشىن مەشىتتەرىمىزدى اشامىز. بۇل ەلىمىزدەگى بارلىق مەشىتتىڭ ەسىگى اشىلادى دەگەن ءسوز ەمەس. ويتكەنى ءار وبلىستاعى كارانتين جاعدايى ءارتۇرلى. باس سانيتارلىق دارىگەردىڭ كارانتين رەجيمىن كەزەڭدىك تالاپتارىن ساقتاۋ بويىنشا قاۋلىسىن ۇستانۋدامىز. سونىمەن قاتار وڭىرلەردەگى كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى جەدەل شتابتىڭ قاۋلىسىنا سايكەس جۇمىس جۇرگىزەمىز. وسىعان وراي وبلىستاعى مەشىتتەرىمىزدىڭ اشىلۋى - سول وڭىرلەردەگى كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى جەدەل شتابتىڭ قاۋلىسىنا سايكەس جۇزەگە اسىرىلادى» ، - دەدى باس ءمۇفتي و ك ق- دا وتكەن باسپا ءسوز ءماسليحاتىندا. ونىڭ ايتۋىنشا، كارانتين تالاپتارىن ساقتاۋ ءۇشىن جاماعاتپەن وقىلاتىن بەس ۋاقىت، جۇما، تاراۋىق نامازدارىنا قاتىستى ۋاقىتشا شەكتەۋلەر ءوز كۇشىندە قالادى.
«جاماعاتپەن وقىلاتىن نامازداردىڭ مەرزىمىن الداعى ۋاقىتتا قوسىمشا حابارلايمىز. قاسيەتتى كىتابىمىز قۇراندا «قيىندىقپەن بىرگە جەڭىلدىك بەر. اللا سىزدەرگە جەڭىلدىكتى قالايدى» دەگەن. اللاعا شۇكىر، ەلىمىزدە ت ج رەجيمى اياقتالىپ، حالقىمىز قالىپتى ومىرگە اۋىسا باستادى. الايدا كارانتين تالاپتارىن قاتاڭ ساقتاپ، ساقتىق شارالارىن اسا ءمان بەرۋىمىز كەرەك» ، - دەدى ول.
ناۋرىزباي قاجى تاعان ۇلى مەشىتكە كەلۋشىلەرگە كەلەسى تالاپتاردى ساقتاۋعا شاقىرىپ، ۇندەۋ تاستادى:
- مەشىتكە كەلۋشى بارشا جاماعاتتى مەديتسينالىق ماسكا جانە قولعاپ كيىپ كەلۋگە؛
- انتيسەپتيك قۇرالىن ءجيى قولدانۋعا؛
- جەكە قۇلشىلىق جاساۋ كەزىندە ءبىر جارىم مەتر ارا قاشىقتىقتى ساقتاۋعا؛
- قۇران وقيتىن بولمەدە ءبىر جارىم مەتر قاشىقتىقتى ساقتاپ وتىرىپ، ون ادامنان ارتىق كىرمەۋگە؛
- نەكە قيدىراتىن بولمەگە ءتورت ادامنان ارتىق كىرمەۋگە؛
- مەشىت يمامدارىنىڭ كەڭەسىنە قۇلاق اسىپ، مەشىتكە لەك- لەگىمەن، كەزەكپەن كىرۋگە؛
- مەشىتكە 15 مينۋتتان ارتىق بولماۋعا (مەشىت اۋاسىن ءار ءۇش ساعات سايىن تازارتىپ وتىرۋ ءۇشىن) .
