ميعا قونىمسىز: يتاليالىق سۋرەتشىنىڭ عاجايىپ تۋىندىلارىن بىلەسىز بە

نۇر -سۇلتان. قازاقپارات - يتاليالىق سۋرەتشى زاتتاردى تەحنيكالىق تۇرعىدان جارامسىز ەتىپ نەمەسە قولدانۋعا بولمايتىنداي قىلىپ بەينەلەيدى.

ءدال وسىنداي پرينسيپتەگى سۋرەتتەر جيناعى جارىق كورگەن دەپ حابارلايدى KAZ. NUR. KZ پورتالى BIG Picture سايتىنا سىلتەمە جاساپ.

شۆەيتساريادان شىققان يتاليالىق سۋرەتشى دجۋزەپپە كولارۋسسو مۇلدەم پايداسىز زاتتاردىڭ سۋرەتىن سالۋعا ۇمتىلعان. «ەكىتالاي» دەپ اتالاتىن جيناعىندا سۋرەتشى قاراپايىم زاتتاردى تەحنيكالىق تۇرعىدان جارامسىز جانە قولدانۋعا بولمايتىن ابسۋردتىققا اينالدىردى. نەلىكتەن مۇنداي سۋرەتتەر سالاتىنىن سۇراعاندا، سۋرەتشى ونىڭ شىعارمالارى تەك كوڭىل كوتەرۋگە جانە تەرەڭ ويلانۋعا ارنالعان دەپ جاۋاپ بەردى.

ەستەرىڭىزگە سالا كەتسەك، كەرەم دجيگەردجي (Kerem Cigerci) - ستامبۋلدىق 19 جاستاعى سيفرلىق سۋرەتشى جايلى جازعان ەدىك. جاسىنا قاراماستان ول ءوز ءىسىنىڭ مامانى. كەرەمنىڭ كرەاتيۆتى ديزاين سالاسىندا شىعارماشىلىقپەن اينالىسىپ جۇرگەنىنە بىرنەشە جىل بولعان.