اتىراۋدا سارمات داۋىرىندەگى «التىن ايەل» بەينەسىنىڭ ەسكيزى ۇسىنىلدى
مۋزەي ديرەكتورى راشيدا حاريپوۆانىڭ مالىمەتىنشە، «التىن ايەل» سارمات داۋىرىندە ءومىر سۇرگەن. جەرگىلىكتى ارحەولوگتار ءۇش جىل بۇرىن قىزىلقوعا اۋدانىنداعى قورعانداردى قازۋ كەزىندە التىن بۇيىمدارىنىڭ بولشەكتەرىن تاپقان.
«العاشقى زەرتتەۋلەر بارىسىندا قورعاندا سارمات داۋىرىندەگى باي ايەل جەرلەنگەن دەپ توپشىلاندى. ويتكەنى، قورعاننان التىن جاپسىرمالار، كەراميكالىق ىدىستار، قولا مەن مەتالدان جاسالعان جەبە ۇشتارى، ات ابزەلدەرى، قاباننىڭ ازۋ ءتىسى، ىدىستاردىڭ اڭدار فيگۋراسى تۇرىندەگى قۇلاعى سەكىلدى كونە بۇيىمدار تابىلعان ەدى. ەرەكشەلىگى سول، التىن اشەكەيلەر اۋقاتتى قاۋىمنىڭ وكىلى سانالعان ايەلگە تيەسىلى بولىپ تۇر. اشەكەيلەر مەن سۇيەكتەردىڭ ساقتالعان بولىكتەرى نەگىزىندە وسىنداي توقتام جاسادىق» - دەيدى اتىراۋ وبلىستىق تاريحي- ولكەتانۋ مۋزەيىنىڭ ديرەكتورى راشيدا حاريپوۆا.
بارلىق كونە جادىگەرلەر الماتىداعى ۇلتتىق ساراپتاما جانە سەرتيفيكاتتاۋ ورتالىعىنا جىبەرىلگەن. مۇندا «التىن ايەلدىڭ» جاسىنا، سونداي- اق، اشەكەيلەردىڭ حيميالىق قۇرامىنا زەرتتەۋ جۇرگىزىلگەن. سونداي- اق، سۋرەتشى- رەستاۆراتور قىرىم التىنبەكوۆ جەتەكشىلىگىمەن «وستروۆ كرىم» عىلىمي- رەستاۆراتسيالاۋ زەرتحاناسىندا «التىن ايەل» بەينەسىن رەستاۆراتسيالاۋ مەن ەسكيزىن جاساۋ جۇمىستارى جۇرگىزىلگەن.
«قۇندى جادىگەرلەردىڭ قۇرامى مەن سالماعى انىقتالدى. كەي اشەكەيلەردىڭ التىننان جاسالعانى 91 پروتسەنتكە دالەلدەندى. زەرتحانالىق زەرتتەۋلەردەن كەيىن قۇندى جادىگەرلەر ءبىزدىڭ ەرامىزعا دەيىنگى 4- عاسىردا ءومىر سۇرگەن ايەلدىڭ بۇيىمدارى دەي الامىز» - دەيدى راشيدا حاريپوۆا.
ارحەولوگتار كارانتين اياقتالعاننان كەيىن «التىن ايەلدىڭ» بەينەسىن قالىپقا كەلتىرۋگە دايىندالۋدا. ەجەلگى قورعانداردى قازۋ قايتا جالعاسپاق. عالىمدار سول كەزدە جۇمباق ايەلدىڭ تولىق بەينەسىن جاساۋعا سەپتىگى تيەتىن قوسىمشا جادىگەرلەر تابىلاتىنىنا ۇمىتتەنىپ وتىر.
اۆتور: بەك مۇستافا
