الماتىدا قوناقۇي، قوعامدىق تاماقتانۋ جانە ءدىني ورىندار كەزەڭ- كەزەڭمەن اشىلادى

الماتى. قازاقپارات - الماتى قالاسىنداعى قوعامدىق تاماقتانۋ، عيبادات ەتۋ جانە قوناق ءۇي كەشەندەرىنىڭ نىساندارىنا قويىلعان شەكتەۋ شارالارى قالاداعى ەپيدەميولوگيالىق جاعدايعا بايلانىستى كەزەڭ- كەزەڭمەن الىناتىن بولادى، دەپ حابارلايدى قازاقپارات ءتىلشىسى.

«قوعامدىق تاماقتانۋ جانە قوناق ءۇي كەشەندەرىنىڭ نىساندارىن ىسكە قوسۋعا قاتىستى دايىندىق جۇمىستارى بويىنشا مەگاپوليستىڭ بيزنەس قاۋىمداستىعىمەن بىرلەسىپ، اتالعان سەكتورلاردىڭ ۇيىمدارىن سانيتاريالىق- ەپيدەميولوگيالىق تالاپتار ساقتالعان جاعدايدا، 25 - مامىردان باستاپ كەزەڭ- كەزەڭمەن ىسكە قوسۋ ماسەلەسى تالقىلانىپ جاتىر»، - دەپ حابارلادى اكىمدىك.

قالا اكىمدىگى الماتىدا تاۋەكەل توپتارىن جاپپاي تەستىلەۋ جانە ينفەكتسيانىڭ جاسىرىن وشاقتارىن انىقتاۋ بويىنشا جۇمىستارىنىڭ جالعاسىپ جاتقان ەسكەرە وتىرىپ ءدىني عيماراتتارعا (مەشىت، شىركەۋ، عيباداتحانا، سيناگوگا جانە ت. ب. ) بارۋعا شەكتەۋدى 18 - مامىردان باستاپ الۋعا ءالى ەرتە ەكەنىن اتاپ ءوتتى.

«الماتى قالاسىنداعى عيبادات ەتۋ ورىندارىنىڭ قىزمەتىن قايتا جالعاستىرۋ جانە قالالىقتاردىڭ ولارعا بارۋىنا شەكتەۋدى سانيتارلىق- ەپيدەميولوگيالىق تالاپتار ساقتالعان جاعدايدا، 2020 -جىلعى 25 - مامىردان باستاپ كەزەڭ كەزەڭمەن الىپ تاستاۋ جوسپارلانىپ وتىر»، - دەلىنگەن حابارلامادا.

بارلىق ىسكە قوسىلاتىن نىساندار جاڭا ۇسىنىمدارعا: الەۋمەتتىك قاشىقتىق، جۇمىس ورىندارىنداعى قاتاڭ سانيتارلىق رەجيم جانە ت. ب. تالاپتارعا سايكەس جۇمىس ىستەۋگە مىندەتتى. بۇل رەتتە، جۇمىس ورىندارىنا تىكەلەي قاجەتتى جۇمىسشىلار سانىن اتالعان ۇيىمداردىڭ باسشىلارى وزدەرى بەلگىلەيدى.