بالالارعا جۇققان كوروناۆيرۋس سيرەك كەزدەسەتىن قانداي اۋرۋعا سوقتىرۋى مۇمكىن

نۇر- سۇلتان. قازاقپارات - قازاقستاننىڭ جەتەكشى ينفەكتسيونيست دارىگەرى، مەديتسينا عىلىمدارىنىڭ دوكتورى ديناگۇل باەشيەۆا بالالارعا جۇققان كوروناۆيرۋس سيرەك كەزدەسەتىن قانداي سيندرومدارعا سوقتىرۋى مۇمكىن ەكەندىگىن ايتتى، دەپ حابارلايدى قازاقپارات ءتىلشىسى.

«قازىر قوعامدا ءارتۇرلى پىكىر بار. سولاردىڭ بىرىنە قۇلاق اسىپ وتىرساق، بالالاردىڭ بويىندا يممۋنيتەت قالىپتاسۋ ءۇشىن ولار كوروناۆيرۋستى ءبىر رەت جۇقتىرىپ، جازىلۋى كەرەك دەيدى. ءبىراق بۇل ماسەلەگە كەلگەندە مەنىڭ كوزقاراسىم باسقاشا. ەگەر بالا كوروناۆيرۋس جۇقتىرىپ السا وندا ول - ۆيرۋس جۇقتىرۋشى بولماق. ەكىنشىدەن فرانتسۋز، يتاليان جانە امەريكالىق عالىمدار بالالارعا جۇققان كوروناۆيرۋس «كاۆاساكي» اتتى سيرەك كەزدەسەتىن سيندرومعا اكەپ سوعۋى مۇمكىن ەكەنىن ايتادى. سول ءۇشىن بالالاردىڭ باسىن مۇنداي قاۋىپكە تىگۋگە بولا ما!؟ مەنىڭ ويىمشا، البەتتە قاجەت ەمەس» ، - دەدى ديناگۇل باەشيەۆا دەنساۋلىق ساقتاۋ مينيسترلىگىنىڭ Facebook-تەگى پاراشاسىنداعى ونلاين سۇحباتىندا.

مەديتسينا مامانى سول سەبەپتى بالاباقشالاردان باستاپ مەكتەپتەردە ەپيدەمياعا قارسى شارالاردى قابىلداۋ كەرەكتىگىن ايتىپ ءوتتى.

«بالالار قولىن جۋىپ، انتيسەپتيكتى پايدالانۋى كەرەك. ولاردى بارىنشا قاشىقتىقتا ۇستاعان ابزال. توسەك ورىندارى ءبىر- بىرىنە تىم جاقىن ورنالاسپاۋى ءتيىس. توسەكتەردىڭ اراسى كەم دەگەندە ءبىر مەتر بولۋى ءتيىس. سونىمەن قاتار بالاباقشاعا كەلگەن بالادا كوروناۆيرۋس بار ما، جوق پا - انىقتاپ وتىرۋ كەرەك» ، - دەدى ول.