سەنات بەيبىت جينالىستاردى ۇيىمداستىرۋ تۋرالى زاڭ جوباسىنا قانداي تۇزەتۋلەر ەنگىزدى

نۇر-سۇلتان. قازاقپارات – ق ر پارلامەنتىنىڭ سەناتى «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» قازاقستان رەسپۋبليكاسى زاڭى جوباسىنا ءبىرقاتار تۇزەتۋ ەنگىزدى، دەپ حابارلايدى قازاقپارات ءتىلشىسى.

«زاڭ جوباسىن تالقىلاۋ بارىسىندا بەيبىت جينالىستاردى ۇيىمداستىرۋ جانە وتكىزۋ ءۇشىن ارنايى ورىنداردى بەلگىلەۋ جانە ونىڭ سانىنا قاتىستى سۇراقتار بولدى، ول قوعامدا دا كەڭىنەن تالقىعا ءتۇستى. كوميتەت استانانىڭ، رەسپۋبليكالىق ماڭىزى بار جانە وبلىس ورتالىقتارى بولىپ ەسەپتەلەتىن قالالار مەن ولاردىڭ قۇرامىنا كىرەتىن اۋدانداردا ارنايى ورىندار مىندەتتى تۇردە ورتالىقتا ورنالاسۋى جانە ولاردىڭ سانى ۇشەۋدەن كەم بولماۋى تيىس دەگەن پىكىردە. بۇل جينالىستار مەن ميتينگىگە، توسقاۋىل قويۋعا قاتىسۋشىلاردىڭ «كورىنۋ جانە ەستىلۋ» جانە ولاردى وتكىزۋ مۇمكىندىگىن ارتتىرادى»، - دەدى سەناتتىڭ جالپى وتىرىسىندا زاڭ جوباسى بويىنشا بايانداما جاساعان سەناتور سارسەنباي ەڭسەگەنوۆ.

ونىڭ ايتۋىنشا، اتالعان ۇسىنىس زاڭ جوباسىنىڭ وسى ماسەلەنى رەتتەيتىن 9-بابىنىڭ 2-تارماعىنا قوسىمشا ەكىنشى بولىك رەتىندە ەنگىزىلگەن. سونىمەن بىرگە، زاڭ جوباسىنىڭ بەيبىت جينالىستار وتكىزۋدەن باس تارتۋ نەگىزدەرىن ايقىندايتىن 14-باپتىڭ 1-تارماعىنىڭ 10-تارماقشاسىن الىپ تاستاۋ ۇسىنىلادى.

«ءبىزدىڭ ويىمىزشا بەيبىت جينالىستار وتكىزۋ كەزىندە تىرشىلىكتى قامتاماسىز ەتۋگە بايلانىستى ماسەلەلەر ارنايى ورىنداردى بەلگىلەگەن كەزدە قارالىپ ەسكەرىلۋى كەرەك. بەيبىت جينالىستاردى توقتاتۋ نەگىزدەرى مەن ءتارتىبى 18-باپتا كوزدەلگەن. وسى باپتىڭ 1-تارماعىنىڭ 3-تارماقشاسىنا سايكەس بەيبىت جينالىستارعا قاتىسۋشىلاردىڭ كۇش قولدانۋ ارەكەتتەرىن جاساۋى، سونداي- اق بەيبىت جينالىستاردى ۇيىمداستىرۋشىنىڭ بەيبىت جينالىستى ۇيىمداستىرۋ جانە وتكىزۋ تارتىبىنە قاتىستى وسى زاڭىنىڭ تالاپتارىن بۇزۋى بەيبىت جينالىستى توقتاتۋعا نەگىز بولادى»، - دەدى سەناتور.

س. ەڭسەگەنوۆتىڭ پايىمىنشا، بۇل قوعامدىق ءتارتىپ، دەنساۋلىق ساقتاۋ، باسقا ادامداردىڭ قۇقىقتارى مەن بوستاندىقتارىن قورعاۋعا باعىتتالعان ماڭىزدى نورما. ونىڭ زاڭدا ورىن الۋى ءجون. «دەگەنمەن، قاتىسۋشى نەمەسە قاتىسۋشىلار تاراپىنان زاڭنىڭ بۇزىلۋى جويىلعان جاعدايدا بەيبىت جينالىستاردى جالعاستىرۋعا مۇمكىندىك بەرۋ دۇرىس دەگەن ويدامىز. سوندىقتان جوعارىدا اتالعان نورمانى الىپ تاستاۋ جانە 18-باپتى جاڭا 4 تارماقپەن تولىقتىرۋ ۇسىنىلادى»، - دەدى ول.

وسىدان كەيىن دەپۋتاتتار اتالعان زاڭ جوباسىنا سەنات ەنىزگەن تۇزەتۋلەردى ماجىلىسكە جىبەرۋ تۋرالى قاۋلىعا ءبىراۋىزدان داۋىس بەردى.