اتىراۋ قالاسىنا ۇشۋعا شەكتەۋ قويىلدى

نۇر- سۇلتان. قازاقپارات - بۇگىننەن باستاپ ءبىرقاتار قالالارعا اۋە قاتىناسى جانداندى، دەپ حابارلايدى قازاقپارات ازاماتتىق اۆياتسيا كوميتەتىنە سىلتەمە جاساپ.

قازاقستان رەسپۋبليكاسى اۋماعىندا كوروناۆيرۋستىق ينفەكتسيانىڭ پايدا بولۋى مەن تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ شەشىمىنە سايكەس، ق ر دەنساۋلىق ساقتاۋ مينيسترلىگىنىڭ ۇسىنىستارىن ەسكەرە وتىرىپ، 13 - مامىردان باستاپ نۇر- سۇلتان مەن الماتى قالالارىنان شىمكەنت، اقتاۋ، ورال، جەزقازعان، بالقاش، زايسان جانە ءۇرجارعا رەيستەر قايتا اشىلىپ جاتىر. رەيستەر قازاقستاندىق اۋە كومپانيالارىنىڭ رەسمي سايتىندا جاريالانعان كەستەگە سايكەس ورىندالادى. ساپار كولىكتەگى باس سانيتار مەملەكەتتىك دارىگەر بەكىتكەن سانيتارلىق قاۋىپسىزدىكتىڭ جوعارى شارالار شارتتارىنا سايكەس جۇزەگە اسىرىلادى:

- جەكە قورعانىس جابدىقتارىن پايدالانۋ (بەتپەردە، قولعاپ)؛

- تەرمومەتريا، اۋە كەمەسىنىڭ بورتىنا وتىرۋعا دەيىن الەۋمەتتىك قاشىقتىقتى ساقتاۋ؛

- اۋەجايلار مەن اۋە كەمەلەردىڭ كۇشەيتىلگەن دەزينفەكتسياسى. جازعى مەرزىمدە اۋە تاسىمالدارىنا سۇرانىستىڭ ارتاتىنىن نازارعا الىپ، اۋە كومپانيالارى ق ر دەنساۋلىق ساقتاۋ مينيسترلىگىنىڭ سانيتارلىق- كارانتيندىك شارالارىن جانە سۇرانىستى ەسكەرىپ، قالالار اراسىندا قاتىنايتىن رەيستەر سانىن وزدەرى انىقتايدى. بۇگىنگى تاڭدا ق ر دەنساۋلىق ساقتاۋ مينيسترلىگىنىڭ ۇسىنىسىنا بايلانىستى اتىراۋ قالاسىنا ۇشۋعا شەكتەۋ قويىلعان. قازاقستان اۋە كومپانيالارى ۆەدومستۆوارالىق كوميسسيانىڭ شەشىمىنسىز ۇشۋعا تىيىم سالىنعان جەرلەرگە اۋە بيلەتتەرىن ساتۋعا بولمايتىنى تۋرالى حاباردار.