كوروناۆيرۋستان ەمدەلىپ شىققان جاندار ەندى دونور بولا الادى
ەندى كەسەلگە توتەپ بەرگەن سول انتيدەنەلەردى وزگە ناۋقاستاردىڭ قانىنا جىبەرۋ كوزدەلىپ وتىر. دونورلار بۇعان كەلىسكەن. مۇنداي ءادىس قازىر الەمنىڭ كوپتەگەن ەلىندە قولدانىلىپ جاتىر. مامانداردىڭ ايتۋىنشا، كوروناۆيرۋسپەن كۇرەستە وسىنداي ءتاسىل تيىمدىلىگىن كورسەتىپ ۇلگەرگەن.
ولار اعزاداعى يممۋندىق جاسۋشىلارى بار پلازمانى اۋىر حالدەگى جاندارعا قۇيۋ ارقىلى، ناۋقاستىڭ بەتىن بەرى قاراتۋعا اتسالىسادى.
نازار ساتپەكوۆا - ىندەتتىڭ ىلمەگىنە العاشقى بولىپ ىلىنگەندەردىڭ ءبىرى. ءتيىستى ەم- دومىن قابىلداپ، اۋرۋدان قۇلان تازا ايىققان سوڭ اۋىر حالدەگىلەرگە كومەكتەسۋ ءۇشىن قان تاپسىرۋعا كەلگەن. ويتكەنى دەرت دەندەسە، ادامداردىڭ قالاي قينالاتىنىن جاقسى بىلەدى.
نازار ساتپەكوۆا، دونور:
- ءۇش رەت قاتتى كۇيزەلىسكە ءتۇستىم. ءبىرىنشى سول، ەستىگەن كۇنى. ودان كەيىن ءبىرىنشى ادام قايتىس بولعانىن ەستىگەن كۇنى كۇيزەلىسكە ءتۇستىم. مەن بۇل ءبىر ەشقاشان ەمدەلمەيتىن اۋرۋ دەپ ويلادىم. ءبىر جاعىنان ءبىلدىم ەمدەلەتىنىمدى، ءبارىن. ءبىراق ەندى سوندا دا كۇيزەلىسكە ءتۇستىم.
ءيا، ينفەكسيامەن كۇرەسىپ، اۋرۋدى جەڭىپ شىققانداردىڭ اعزاسىندا ۆيرۋسقا قارسى دەنەلەر بولىنەدى. ال، بۇل دەنەلەر قاننان اجىراتىلعان پلازما، ياعني، سىركەسۋدان الىنادى. قاتتى اۋىرىپ، قينالىپ جاتقاندارعا وسى سىركەسۋى قۇيىلسا، ول يممۋنيتەتتى كۇشەيتۋگە سەپتەسەدى. ەمدەۋدىڭ ءداستۇرلى تۇرىنەن داۋلەتحان ەسىموۆ حاباردار. ءومىرىنىڭ 35 جىلىن مەديتسيناعا ارناعان جان اۋرۋدان جازىلعان سوڭ بىردەن «قان تاپسىرامىن» دەپ شەشكەن.
داۋلەتحان ەسىموۆ، دونور:
- پلازمانىڭ كومەگى وتە جاقسى. وتە اۋىر حالدەگى كىسىلەرگە وسى پلازما قۇيۋ ارقىلى، پلازمامەن ەمدەۋ ارقىلى جاندارىن ساقتاپ قالۋعا بولادى. سوندىقتان مەن وسى پروتوكولدى جاساۋعا قاتىسقاندىقتان، وزىمدە دە سونداي وي بولدى. ەگەر پلازمامەن ەمدەيتىن بولساق، انتيدەنە بولسا اعزامدا، وسى قان تاپسىرىپ، ءبىر ادامنىڭ بولسىن، ەكى ادامنىڭ بولسىن، جانىن الىپ قالۋعا كومەكتەسسەم جاقسى بولار ەدى دەگەن ويمەن بۇگىن كەلىپ تاپسىرىپ جاتىرمىن.
كەسەلدى كەز كەلگەن ادام جۇقتىرۋى مۇمكىن. مەديتسينالىق ۇيىمدار اليانسىنىڭ ءتوراعاسى كوروناۆيرۋستى قايدان، قاشان جۇقتىرعانىن بىلمەي قالعانىن ايتادى. اۋرۋدىڭ قاتەرى جايلى جاقسى تۇسىنەدى دە.
داۋلەتحان ەسىموۆ، دونور:
- مەن مىنا ستاتسيونارلىق ەمحانادا جاتقاندا اۋىر حالدەگى، قاتتى اۋىرىپ جاتقان كىسىلەردى كوردىم سول جەردە. ءوزىم دە، ەكى جاق وكپەم قابىنىپ، ەكى جاق وكپەدەن سەگمەنتارلىق پنيەۆمونيامەن اۋىرىپ شىقتىم. سوندىقتان وسى «كارانتيندى سوزباڭدار، كارانتين جوق» دەگەن كىسىلەرگە ايتاتىن اقىلىم، كارانتيندە ءوزىڭىزدى قورعايسىز، وزدەرىڭىزدىڭ تۋىستارىڭىزد قورعايسىز، قىزمەتتەس بىرگە ىستەپ جاتقان ادامدارىڭىزدى وسى ىندەتتەن قورعاپ قالۋعا سەپتىگىن تيگىزەدى.
تۇتاس ەلدەگى العاشقى ەكى دونوردىڭ پلازماسى ەندى جۇقپالى اۋرۋلار اۋرۋحاناسىنا جونەلتىلەدى. وسىلايشا، جاعدايى اۋىر جانداردى ەمدەۋگە قولدانىلادى. دەگەنمەن، قاجەتتى قان قورىن جاساقتاۋ ءۇشىن ءبىراز ۋاقىت كەرەك.
ءسانيا ءابدىراحمانوۆا، ترانسفۋزيولوگيا عىلىمي- وندىرىستىك ورتالىعىنىڭ ديرەكتورى:
- العاشقى فاكتورلاردىڭ ءبىرى - ول ۋاقىت. بۇگىن قان تاپسىرىپ جاتقان ادامدار ناۋرىزدىڭ باسى مەن ورتا شەنىندە اۋىرا باستادى. اۋرۋحانادان ءساۋىردىڭ ورتاسىندا عانا جازىلىپ شىقتى. ويتكەنى حالدەرى ءسال ناشارلاۋ بولعان ەدى. ودان كەيىن كەم دەگەندە 21 كۇن ءۇي كارانتينىندە بولدى. قۇلان تازا ايىعىپ شىققانشا ءبىر جارىم ايداي ۋاقىت كەرەك. سوندا عانا پلازما تاپسىرا الادى. بۇعان دەيىن دە اۋىرىپ شىققان بىرنەشە ادامنان سىناما الىنعان ەدى. الايدا، ولار اۋرۋدى جەڭىل كوتەرگەندىكتەن، اعزالارىندا قارسى دەنەلەر تابىلمادى.
قان ورتالىعىنىڭ ماماندارى «قاجەت پلازما نەگىزى تەك قاتتى اۋىرىپ شىققانداردان الىنادى»، دەيدى. ايتا كەتەرلىگى، پلازماسى جارامدى دونورلارعا 7 ايلىق ەسەپتىك كورسەتكىش، نەمەسە 19 مىڭ تەڭگە كولەمىندە سىياقى بەرىلەدى.
www.24.kz
