قىزىلوردادا بەس اۋداندا كوروناۆيرۋس جۇقتىرعاندار تولىعىمەن جازىلىپ كەتتى
بۇگىنگە دەيىن وبلىستا 231 ادام قاتەرلى ىندەتتى جۇقتىرعان. ونىڭ 181- ءى اتالعان دەرتتەن ايىعىپ شىقتى. اتاپ ايتقاندا، شيەلىدە – 66، جاڭاقورعاندا – 31، سىرداريادا – 26، قارماقشىدا – 5، قازالىدا - 3 ناۋقاستىڭ بارلىعى تولىقتاي ەم قابىلداپ، ۇيلەرىنە ورالدى. ال قىزىلوردا قالاسىندا - 94 ناۋقاستىڭ 46-سى، ارال اۋدانىندا - 6 ناۋقاستىڭ تورتەۋى تولىق ەمدەلدى.
«بۇگىن ساعات 14:30-دەگى جاعدايى بويىنشا ايماعىمىزدا كوروناۆيرۋس ىندەتىنەن تاعى 9 ناۋقاس ەمدەلىپ شىقتى. ولاردىڭ ەمى تولىق اياقتالعان سوڭ، 2 رەت تەست سىناماسى الىندى. سىناما ناتيجەسى تەرىس كورسەتكىش كورسەتتى. ولار اۋرۋحانادان ۇيلەرىنە قايتارىلدى. ىندەتتى جەڭگەن 9 ناۋقاستىڭ التاۋى - قىزىلوردا قالاسىنان بولسا، بىرەۋى - قارماقشى، تاعى ءبىرى - قازالى، ءبىر ادام - جاڭاقورعان اۋداندارىنان. ەمدەلۋشىلەر الداعى ۋاقىتتا 14 كۇن بويى ايماقتىق دارىگەرلەر باقىلاۋىندا بولادى»، - دەپ ءمالىم ەتتى قىزىلوردا وبلىستىق دەنساۋلىق ساقتاۋ باسقارماسى.
اۆتور: ءادىلجان ۇمبەت
