جەر بەتىندەگى ەڭ كونە جاراتىلىس يەسى
بىردە ەلباسىمىز ۇلىتاۋدىڭ ەتەگىندە سۇقبات بەرىپ وتىرىپ: «ۇلىتاۋدىڭ قايىڭدارى تالاي قازاق حاندارىنىڭ بيلىگىنە كۋا عوي»، - دەگەنى بار. شىنىمەن دە، جەر بەتىنىڭ وزگە جاراتىلىس يەلەرىنە قاراعاندا اعاشتاردىڭ عۇمىر كەشۋ ۋاقىتى الدەقايدا ۇزاق، عاسىردان عاسىرعا جالعاسۋدا.
وسى كۇنگە دەيىن عالىمدارىمىز جەر شارىنداعى اعاشتاردىڭ قايسىسى جاسى ۇلكەن ەكەندىگىن، كونە ەكەندىگىن انىقتاي الماعان ەدى.
2013 -جىلعا دەيىن ەڭ ۇزاق ءومىر سۇرگەن اعاش كاليفورنيا تاۋلارىنداعى مافۋسايل ەسىمدى قاراعاي دەپ ەسەپتەلىپ كەلدى. ونىڭ جاسى - 4845 جىل.
وعان دەيىن ودان 300 جاس ۇلكەن پروموتەي ەسىمدى قاراعاي بولعان ەكەن.
الايدا ونى ءبىر ساياحاتشى- ستۋدەنت بايقاۋسىزدا (الاڭعاسارلىقپەن) ورتەپ جىبەرگەن. دەگەنمەن عالىمدارىمىز ودان كەيىن 5062 جاستاعى تاعى ءبىر رەكوردسمەن- قاراعايدى تاپقان. ويلاپ قاراساڭىز، بۇل قارت قاراعاي - ادامزاتتىڭ جازۋدى ويلاپ تاپقانىنان بەرى جازىلعان بارلىق تاريحي وقيعالاردى كوزبەن كورگەن، بىلايشا ايتقاندا ادامزاتتىڭ سوڭعى 5 مىڭجىلدىق تاريحىنا تۇگەلدەي كۋاگەر بولعان جالعىز جاراتىلىس يەسى.
بۇل قاراعاي ا ق ش- تىڭ كاليفورنيا شتاتىندا، اق تاۋدىڭ ەتەگىندە وسكەن. ەسىمى - بريستلەكون.
ال ەۋروپاداعى ەڭ كونە اعاش - گرەتسياداعى 1075 جاستاعى گەلدرەيح ەسىمدى قاراعاي. ەۋروپانىڭ ورماندارى قاشاندا سىرعا دا، سىنعا دا تولى عوي. كونتينەنتتىڭ كونە ورماندارىندا «گەلدرەيح- شالدان» دا كورگەنى كوپ «اقساقالداردىڭ» بولۋى مۇمكىن.
دەگەنمەن عالىمدارىمىز، ازىرشە، كوسەگەسى كوگەرگەن مۇنداي كونە قارتتارىمىزدى كەزدەستىرە قويماپتى. مۇنداي قارت قاراعايلارمەن سالىستىرعاندا، الەمدەگى ەڭ جاسى ۇلكەن جانۋار دەپ تانىلعان 183 جاستاعى تاسباقا جاي عانا جەتكىنشەك بولىپ قالارى ءسوزسىز.
Massaget.kz
