اتىراۋدا كوروناۆيرۋس جۇقتىرعان ەكى جۇكتى ايەل بوساندى

اتىراۋ. قازاقپارات - اتىراۋدا كوروناۆيرۋس جۇقتىرعان ەكى جۇكتى ايەل بوساندى، دەپ حابارلايدى قازاقپارات دەنساۋلىق ساقتاۋ مينيسترلىگىنە سىلتەمە جاساپ.

«بۇگىن 2№ اتىراۋ وبلىستىق اۋرۋحاناسىندا كوروناۆيرۋس جۇقتىرعان ەكى جۇكتى ايەل بوساندى. اتالعان اۋرۋحانانىڭ بىلىكتى حيرۋرگتارى مەن انەستەزيولوگ ماماندارى، اتىراۋ وبلىستىق پەريناتالدىق ورتالىقتىڭ دارىگەر-رەانيماتولوگتارى، گينەكولوگتارى، اكۋشەر قۇرامى مەن نەوناتولوگتار ولاردى امان-ەسەن بوساندىرىپ الدى»، - دەلىنگەن اقپاراتتا.

دۇنيەگە كەلگەن ۇل جانە قىز بالالاردان كوروناۆيرۋسقا اناليز الىندى. ناتيجەلەرى ەرتەڭ بەلگىلى بولادى.

«29 جانە 24 جاستاعى جۇكتى ايەلدەر ينفەكتسيالىق ستاتسيونارعا جۇكتىلىكتىڭ 38 اپتاسىندا كوروناۆيرۋس ينفەكتسياسىنىڭ سيمپتومسىز راستالعان جاعدايىمەن قابىلدانعان بولاتىن. بوسانعان انالار جۇقپالى اۋرۋلار بولىمشەسىندە حاتتاماعا سايكەس ەمىن جالعاستىرادى. نارەستەلەر انالارىنان وقشاۋلانىپ، ارنايى ازىرلەنگەن تازا پالاتاعا اۋىستىرىلدى. جاعدايلارى قاناعاتتانارلىق، دارىگەرلەردىڭ باقىلاۋىندا»، - دەيدى 2№ اتىراۋ وبلىستىق اۋرۋحاناسى ديرەكتورىنىڭ ورىنباسارى ناديا ەرعاليەۆا.

ايتا كەتەيىك، بوسانۋ ۋاقىتى جاقىنداعان 29 جانە 24 جاستاعى جۇكتى ايەلدەردەن كوروناۆيرۋس انىقتالعاننان كەيىن ولار بىردەن اتالعان اۋرۋحانانىڭ يزولياتورىنا جاتقىزىلعان.