21:40, 12 - مامىر 2020 | GMT +5
د د س ۇ: كوروناۆيرۋستىڭ مۋتاتسياعا ۇشىراعانى تۋرالى ەشقانداي دالەل جوق
نۇر-سۇلتان. قازاقپارات - كوروناۆيرۋستىڭ ماڭىزدى مۋتاتسياعا ۇشىراعانى تۋرالى دالەل جوق. بۇل جونىندە دۇنيەجۇزىلىك دەنساۋلىق ساقتاۋ ۇيىمىنىڭ شىعىس جەرورتا تەڭىزىندەگى ايماقتىق كەڭسەسىنىڭ توتەنشە جاعدايلار جونىندەگى ديرەكتورى ريچارد برەننان مالىمدەدى.
«بۇگىنگى كۇنى ءبىز بۇل ۆيرۋستىڭ مۋتاتسيالانۋىنىڭ ەشقانداي دالەلىن كورىپ وتىرعان جوقپىز»، - دەدى برەننان.
ول دۇنيەجۇزىلىك دەنساۋلىق ساقتاۋ ۇيىمى الەمنىڭ كوپتەگەن عىلىمي- زەرتتەۋ ۇيىمدارىمەن جۇمىس ىستەيتىنىن جانە گەنومنىڭ نۋكلەوتيدتەر تىزبەگىن اشۋ ءۇشىن مىڭداعان كوروناۆيرۋس ۇلگىلەرىن تالدايتىنىن ايتتى. برەنناننىڭ ايتۋىنشا، الەمنىڭ كەيبىر بولىكتەرىندە، مىسالى، يتاليانىڭ سولتۇستىگىندە ينفەكسيانىڭ كوپ تاراۋى حالىقتىڭ دەموگرافيالىق كورسەتكىشتەرىنە بايلانىستى بولۋى مۇمكىن. ەگدە جاستاعى ادامداردا باسقا اۋرۋلارىنىڭ بولۋىنا بايلانىستى ينفەكسيا اسقىنۋعا بەيىم بولادى. دۇنيە جۇزىندەگى عالىمدار ءالى كۇنگە دەيىن كوروناۆيرۋستىڭ مۋتاتسياسى تۋرالى ءبىر پىكىرگە قولجەتكىزە المادى.
www.24.kz
