رەسەي كوروناۆيرۋس جۇقتىرعاندار سانى بويىنشا الەمدە ەكىنشى ورىنعا شىقتى
رەسمي راستالعان جاعدايلار سانى بويىنشا يسپانيادان وزىپ، الەم بويىنشا ەكىنشى ورىنعا شىقتى، دەپ جازادى تاسس.
سوڭعى تاۋلىكتە رەسەيدە ينفەكسيا جۇقتىرعان تاعى 10899 ادام انىقتالدى، دۇيسەنبى كۇنى 11656 جاعداي حابارلانعان بولاتىن. قازىر رەسەيلىك 100 مىڭ ازاماتقا 158 جۇقتىرۋ وقيعاسى سايكەس كەلەدى. يسپانيادا بۇل كورسەتكىش جوعارى - 487-گە جەتەدى.
ماسكەۋدە ينفەكسيا جۇقتىرعاندار سانى % 4,65- عا ارتتى. ەڭ تومەنگى كورسەتكىش 21 - ناۋرىز كۇنى تىركەلدى. سول كۇنى رەسەيدە شامامەن 300 جۇقتىرۋ وقيعاسى عانا انىقتالدى. سول كەزدە كورسەتكىش % 4,58 بولعان. وعان قوسا ەلدە كوروناۆيرۋسقا تەست تاپسىرعان ادام سانى ارتىپ جاتىر. ءبىر تاۋلىكتە 168 مىڭ تالداۋ جاسالسا، تەستتەن وتكەن ادامداردىڭ جالپى سانى 5,8 ميلليون. رەسەيدە كوروناۆيرۋستان جازىلىپ شىققاندار تاۋلىك ىشىندە 3711 ناۋقاس اۋرۋحانادان شىعارىلدى. جالپى ەلدە 43512 ادام دەرتتى جەڭىپ شىقتى. وكىنىشكە قاراي، جاڭا ۆيرۋستان 2116 ادام قايتىس بولدى، ونىڭ 107 وتكەن تاۋلىكتە تىركەلگەن.
ادامدار قوعامدىق ورىندا بەتپەردە تاعىپ، قولعاپ كيۋگە مىندەتتى. بۇل جاڭا ەرەجەنى ەلەمەگەندەر جازاعا تارتىلادى. ماسكەۋدە كوروناۆيرۋس جۇقتىرعان ناۋقاستاردىڭ سانى وتە كوپ. ولاردىڭ قاتارى كۇندەلىكتى ارتىپ كەلەدى. ۆيرۋستى جۇقتىرعاندار مەن كوز جۇمعانداردىڭ باسىم بولىگى ماسكەۋدەن. بيلىك وكىلدەرى اۋرۋحاناداعى ورىن تاپشىلىعى سالدارىنان بوس الاڭداردى ەمحاناعا اينالدىرىپ جاتىر. ماسكەۋ كورمە ورتالىعىندا كوروناۆيرۋس جۇقتىرعان ناۋقاستار ءۇشىن 1000 ورىندىق جاڭا اۋرۋحانا اشىلدى. بۇگىننەن باستاپ ماسكەۋ جانە ماسكەۋ وبلىسىنىڭ تۇرعىندارى دۇكەندەردە، ساۋدا ورتالىقتارىندا، قوعامدىق كولىكتىڭ بارلىق تۇرىندە، ءتىپتى تاكسيدە، بەتپەردە كيىپ جۇرۋگە مىندەتتەلدى. جۇمىسقا قايتا ورالعان قىزمەتكەرلەردىڭ دە جەكە قورعانىش زاتتارى بولۋى كەرەك. ويتپەگەن جاعدايدا، تۇرعىندارعا ايىپپۇل تاعىلادى.
قازىر عانا كەلىپ تۇسكەن مالىمەت بويىنشا، رەسەيدە پرەزيدەنتتىڭ باسپا ءسوز حاتشىسى دميتريي پەسكوۆتان كوروناۆيرۋس انىقتالعان. بۇل وسى ەلدەگى ءتورتىنشى شەنەۋنىكتىڭ ىندەت جۇقتىرۋى. بۇعان دەيىن، پرەمەر ميحايل ميشۋستين، قۇرىلىس ءمينيسترى ۆلاديمير ياكۋشيەۆ، مادەنيەت ءمينيسترى ولگا ليۋبيموۆانىڭ «كوۆيد-19-دى» جۇقتىرعانى انىقتالعان ەدى.
