19:03, 12 - مامىر 2020 | GMT +5
ەلەكتروندى ۇكىمەت پەن ءبىرقاتار مەملەكەتتىك ورگاننىڭ سايتىنا حاكەرلىك شابۋىل جاسالدى
نۇر- سۇلتان. قازاقپارات - بۇگىن مەملەكەتتىك ورگانداردىڭ ينتەرنەت- رەسۋرستارىندا، ونىڭ ىشىندە eGov.kz پورتال، «ە- ليتسەنزيالاۋ» جانە «ەلەكتروندىق ۇكىمەتتىڭ» بارلىق كومپونەنتتەرىندە پروبلەمالار پايدا بولدى، دەپ حابارلايدى قازاقپارات.
ق ر ۇ ق ك مەملەكەتتىك تەحنيكالىق قىزمەتى مەن «ۇلتتىق اقپاراتتىق تەحنولوگيالار» ا ق بىرلەسىپ، تەكسەرۋ جۇرگىزدى. ناتيجەسىندە مەملەكەتتىك سەكتوردىڭ ينتەرنەت رەسۋرستارىنا قاتىستى مەملەكەتتىك جانە كۆازيمەملەكەتتىك سەكتور ۇيىمدارىنىڭ ينتەرنەت- رەسۋرستارىنىڭ قولجەتىمدىلىگىنە بايلانىستى پروبلەمالارعا الىپ كەلگەن شەتەلدىك ينتەرنەت سەگمەنتىنەن بولىنگەن DDoS- شابۋىل تىركەلدى. شابۋىل قازاقستاندىق ينتەرنەت سەگمەنتىنىڭ ينتەرنەت- رەسۋرستارىنا الەمنىڭ 48 ەلىنەن 550 دەن استام IP- مەكەنجايلاردان جۇرگىزىلدى.
«بۇل كەزەڭدە رەسۋرستاردىڭ جۇمىسىنا شابۋىلدىڭ اسەرىن ازايتۋ جانە ونى تولىق بۇعاتتاۋ بويىنشا شارالار قابىلدانۋدا. بۇل دەربەس دەرەكتەردىڭ كومپرومەتاتسياسى انىقتالماعانىن قوسىمشا حابارلايمىز» دەپ ءمالىم ەتتى «ۇلتتىق اقپاراتتىق تەحنولوگيالار» ا ق.
