ەلىمىزدە قانشا شەتەل ازاماتى كوروناۆيرۋستان ەمدەلىپ جاتىر
بۇل تۋرالى ق ر باس مەملەكەتتىك سانيتار دارىگەرى ايجان ەسماعامبەتوۆا ق ر دەنساۋلىق ساقتاۋ مينيسترلىگىنىڭ مەديا ورتالىعىندا وتكەن تىكەلەي ەفيردە ايتتى، دەپ حابارلايدى قازاقپارات ءتىلشىسى.
«كوروناۆيرۋس جاعدايى تىركەلگەلى ەلىمىزدەگى ستاتسيونارلارعا 21 شەتەلدىك ازامات ءتۇستى. ونىڭ 14 ءى ەمدەلىپ شىقتى. جەتەۋى قازىر ەمدەلىپ جاتىر، ونىڭ ەكەۋى - نۇر- سۇلتان قالاسىندا، ۇشەۋى - اتىراۋدا، بىرەۋى - قوستاناي وبلىسىندا جانە ەندى بىرەۋى - سولتۇستىك قازاقستان وبلىسىندا. ولاردىڭ جاعدايى ءبىرقالىپتى»، - دەيدى ق ر باس مەملەكەتتىك سانيتار دارىگەرى ايجان ەسماعامبەتوۆا. ونىڭ ايتۋىنشا، وتباسىلىق مەرەكەلەردى وتكىزۋگە تىيىم سالىنعان.
«ايماقتاردىڭ بىرىندە تىيىم سالىنعانىنا قاراماستان اۋىزاشار جاساعان جاعداي كەزدەستى. قوناققا بارعانداردىڭ ىشىندە كوروناۆيرۋس ينفەكتسياسىن جۇقتىرعان ادام بولعان. سوندىقتان قوناققا بارۋدى، قوناق شاقىرۋدى، اۋىزاشارعا بارۋدى توقتاتۋ كەرەك»، - دەيدى ول.
