ەلىمىزدە ەكى عىلىمي ينستيتۋت كوروناۆيرۋسقا قارسى ۆاكتسينا جاساۋمەن اينالىسىپ جاتىر

نۇر- سۇلتان. قازاقپارات - بۇگىندە الەم بويىنشا جەتى عىلىمي ۇجىم كوروناۆيرۋسقا قارسى ۆاكتسينا ويلاپ تابۋ ءۇشىن كلينيكالىق سىناق وتكىزىپ جاتىر.

بۇل تۋرالى ق ر باس مەملەكەتتىك سانيتار دارىگەرى ايجان ەسماعامبەتوۆا ق ر دەنساۋلىق ساقتاۋ مينيسترلىگىنىڭ مەديا ورتالىعىندا وتكەن تىكەلەي ەفيردە ايتتى، دەپ حابارلايدى قازاقپارات ءتىلشىسى.

«كوروناۆيرۋسقا قارسى ۆاكتسينا ەلىمىزدەگى بيولوگيالىق قاۋىپسىزدىك عىلىمي- زەرتتەۋ ينستيتۋتىندا جانە بيوتەحنولوگيا ۇلتتىق عىلىمي ورتالىعىندا جاسالۋدا. جالپى العاندا، الەم بويىنشا كوروناۆيرۋسقا قارسى ۆاكتسينا جاساۋمەن اينالىسىپ جاتقاندار كوپ. بۇگىندە جەتى عىلىمي ۇجىم كلينيكالىق سىناق وتكىزىپ جاتىر»، - دەيدى ق ر باس مەملەكەتتىك سانيتار دارىگەرى ايجان ەسماعامبەتوۆا. ونىڭ ايتۋىنشا، كلينيكالىق سىناق كوروناۆيرۋسقا قارسى ۆاكتسينانىڭ ناتيجەلىگىن كورسەتەدى.

«بۇگىنگى كۇنگى ءبىزدىڭ مىندەت - كوروناۆيرۋسپەن اۋىرعاندار سانىن ازايتۋ. تەستىدەن وتكىزۋدى كوبەيتە بەرۋىمىز كەرەك. مىسالى، ناۋرىز ايىندا 34 مىڭ عانا تەست بولدى جانە اۋىرعاندار مەن ولارمەن بايلانىستا بولعانداردى تەستىلەۋدەن وتكىزدىك. ال ءساۋىر ايىندا پروفيلاكتيكالىق تەستكە كوشتىك. ناۋرىزدان وسى ۋاقىتقا دەيىن 320 مىڭ ادام تەستىدەن ءوتتى. ءساۋىر ايىندا توتەنشە جاعداي كەزىندە جۇمىس ىستەگەن ادامداردى، دارىگەرلەردى، اياعى اۋىر ايەلدەردى، ەمحانادا تىركەۋدە تۇرعانداردى قوستىق» ، - دەيدى ول.