قاسىم- جومارت توقايەۆ الماتىدا قولعا الىنعان ءبىرقاتار ينفراقۇرىلىمدىق جوبامەن تانىستى

الماتى. قازاقپارات - مەملەكەت باسشىسى الماتى قالاسىنا جۇمىس ساپارى بارىسىندا جۇزەگە اسىرىلىپ جاتقان ءبىرقاتار ينفراقۇرىلىمنىڭ جوبالارىمەن تانىستى، دەپ حابارلايدى قازاقپارات اقورداعا سىلتەمە جاساپ.

قازاقستان پرەزيدەنتىنە الماتىنىڭ حالىقارالىق اۋەجايىن قايتا جوندەۋ جوسپارى تانىستىرىلدى. تۇركيانىڭ «TAV airport Holding» كومپانياسى باس ديرەكتورىنىڭ ورىنباسارى سەركان كاپتان قاسىم- جومارت توقايەۆقا اۋەجايدىڭ جاڭا تەرمينالىنىڭ قۇرىلىسى تۋرالى مالىمەت بەردى. جالپى كولەمى 55 مىڭ شارشى مەتر بولاتىن تەرمينال جوباسىنىڭ قۇنى 150 ميلليون ەۋرو. تەرمينال جىلىنا 6 ميلليون جولاۋشىعا قىزمەت كورسەتەدى. اتالعان نىساننىڭ قۇرىلىسى 2022 -جىلدىڭ 2-توقسانىندا اياقتالادى دەپ جوسپارلانۋدا. قاسىم- جومارت توقايەۆ الماتى قالاسىنىڭ حالىقارالىق اۋەجايى قايتا جوندەۋدەن وتكەننەن كەيىن بۇل نىساننىڭ ورتالىق ازيا ايماعىنداعى ءىرى اۆياتسيالىق حابقا اينالاتىنىنا سەنىم ءبىلدىردى. سونىمەن قاتار قازاقستان پرەزيدەنتى بۇقتىرما كوشەسى مەن قۇلجا تراكتىسىنىڭ قيىلىسىندا سالىناتىن ۇزىندىعى 784 مەترلىك كولىك جولايىرىعى قۇرىلىسىنىڭ جوباسىمەن تانىستى. مەملەكەت باسشىسىنىڭ ايتۋىنشا، اتالعان جوبا قالا جولدارىنداعى كەپتەلىستى ازايتۋعا جانە تۇرعىنداردىڭ تىرشىلىگىنە قولايلى جاعداي تۋعىزۋعا مۇمكىندىك بەرەدى.