جاڭا وقۋ جىلى مەكتەپ قابىرعاسىندا باستالادى - اسحات ايماعامبەتوۆ

نۇر-سۇلتان. قازاقپارات - ءبىز ۆەب-تەحنولوگيا، سيفرلاندىرۋ، قاشىقتان وقۋ ماسەلەسىن قولعا الىپ، ءتيىستى دەڭگەيگە جەتكىزۋىمىز كەرەك.

بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ونلاين كونفەرەنسيادا ايتتى، دەپ حابارلايدى قازاقپارات ءتىلشىسى.

«كۇنى كەشە مەملەكەتتىك كوميسسيا وتىرىسى كەزىندە مەملەكەت باسشىسى قاسىم-جومارت توقايەۆ ءبىلىم جانە عىلىم سالاسىنا قاتىستى ماڭىزدى تاپسىرمالار بەرگەن بولاتىن. وسى تاپسىرمالار اياسىنداعى جۇمىستار باستالدى. وقۋ جىلى 25-مامىرعا دەيىن قاشىقتان وقۋ فورماتىندا بولادى. ءبىلىم باعدارلامالارىنىڭ مازمۇنىن وزگەرتۋ، سيفرلاندىرۋ ماسەلەسى، قاشىقتان وقىتۋ تەحنولوگياسىن جەتىلدىرۋ جانە تاعى دا باسقا بەرىلگەن تاپسىرمالار بويىنشا جۇمىستار جۇرگىزىلەتىن بولادى»، - دەيدى ق ر ءبىلىم جانە عىلىم ءمينيسترى اسحات ايماعامبەتوۆ.

ونىڭ ايتۋىنشا، جاڭا وقۋ جىلى ءداستۇرلى تەحنولوگيا رەتىندە مەكتەپ قابىرعاسىندا باستالادى. «جاڭا وقۋ جىلى ءداستۇرلى تەحنولوگيا رەتىندە مەكتەپ قابىرعاسىندا باستالادى دەپ سەنەمىز. جاز ايلارىندا دا مينيسترلىك ءبىلىم باسقارمالارىمەن قوسا جۇمىستار جۇرگىزەتىن بولادى. قانداي جاعداي بولسا دا توتەپ بەرەتىندەي بارلىق جۇمىستاردى جۇرگىزۋىمىز قاجەت. مەكتەپتى بالالارىمىز دا ساعىندى، اتا-انالار دا سونى قالايدى. پەداگوگتار دە مەكتەپتە ساباق بەرۋدى اسىعا كۇتىپ ءجۇر. ءبىز، ارينە، سونداي جاقسىلىققا سەنىپ، دايىن بولۋىمىز كەرەك. كەلەسى وقۋ جىلىن ءداستۇرلى تۇردە باستاساق دەگەن جوسپار بار. دەگەنمەن وسىنداي جاعداي قايتالانبايتىن سياقتى بولماۋ كەرەك. ۆەب- تەحنولوگيا، سيفرلاندىرۋ، قاشىقتان وقۋ ماسەلەسىن قولعا الىپ، ءتيىستى دەڭگەيگە جەتكىزۋىمىز كەرەك»، - دەيدى ول.