مادەنيەت مينيسترلىگى ونلاين جۇمىسىن وزگەشە فورماتتا جالعاستىرادى

نۇر-سۇلتان. قازاقپارات - بۇگىننەن باستاپ قازاقستان رەسپۋبليكاسىنىڭ مادەنيەت جانە سپورت مينيسترلىگى ونلاين جۇمىسىن جاڭا فورماتتا جالعاستىرادى، دەپ حابارلايدى قازاقپارات ءتىلشىسى.

مينيسترلىك وسى جىلدىڭ 23-ناۋرىزىنان باستاپ ەل تۇرعىندارىن رۋحاني، مادەني تۇرعىدان بايىتۋ، ءارتۇرلى جاستاعى ازاماتتاردىڭ سپورتتىق بەلسەندىلىگىن قولداۋ ماقساتىندا ءبىرقاتار جوبالاردى جۇزەگە اسىرىپ كەلەدى.

وسى رەتتە مادەنيەت، سپورت، تۋريزم سالاسى ماماندارىنىڭ ۇيىمداستىرۋىمەن وتكەن ءدارىس، ۆەبينار، ونلاين- كونسەرت («كارانتيندەگى جۇلدىز» «قازاقتەلەكوم» ا ق بىرلەسكەن جوبا)، ونلاين-كونكۋرس («ونەرلى ورەن» بالالارعا ارنالعان رەسپۋبليكالىق كونكۋرس)، ۆيرتۋالدى ەكسكۋرسيا، بالالارعا ارنالعان ەرتەگىلەر، بەلگىلى اتلەتتەرمەن وتكىزىلەتىن جاتتىعۋلار، قاشىقتان جانە ونلاين رەجيمدەگى سپەكتاكلدەر مەن فيلمدەردى ايتا كەتكەن ءجون.

«11-مامىردا مەملەكەت باسشىسى توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ قورىتىندى وتىرىسىندا توتەنشە جاعداي رەجيمى اياقتالعانىمەن، ىندەت باسەڭسىمەي تۇرعان كەي وڭىرلەردە ساقتىق ءىس-شارالارى جۇرگىزىلە بەرەتىنىن ايتقان ەدى.

وسىعان بايلانىستى مينيسترلىك ونلاينداعى جۇمىسىن جاڭا فورماتتا جالعاستىرادى. بۇگىننەن باستاپ ەل تۇرعىندارىنا كۇن سايىن 5 مادەني-سپورتتىق ءىس-شارا ونلايندا قولجەتىمدى بولادى، - دەپ اتاپ وتەدى مادەنيەت مينيسترلىگىنىڭ باسپا ءسوز قىزمەتىنەن.

اتاپ ايتقاندا، تاڭعى ساعات 08:00 دە #BizBirgemiz #العاقازاقستان حەشتەگىمەن تانىمال سپورتشى، باپكەرلەردىڭ قاتىسۋىمەن تاڭعى جاتتىعۋ وتەدى. ەلگە ەسىمى تانىس اتلەتتەر جالپى حالىققا سالاۋاتتى ءومىر سالتىن قالىپتاستىرۋدى ناسيحاتتاپ، وسى باعىتتا ەلەۋلى ۇلەس قوسىپ كەلەدى.

«ەرتەگىلەر الەمىندە» اتتى باعدارلاما ساعات 12:00 مەن 20:30 دا مادەنيەت جانە سپورت مينيسترلىگىنىڭ You Tube ارناسى مەن bizbirgemiz_culture ينستاگرام پاراقشاسىنان ەفيرگە شىعادى. ەلىمىزدىڭ ۇزدىك تەاتر اكتەرلەرى بالالارمەن قيال-عاجايىپ الەمىنە ساياحاتتايدى. ساعات 14:00 دە #óneronline #оnlinedabol حەشتەگىمەن مادەنيەت، ونەر تاقىرىبىندا ونلاين- دارىستەر وتەدى.

بۇل شەبەرلىك- ءدارىسىن مادەنيەت جانە سپورت مينيسترلىگىنىڭ You Tube ارناسىنان تاماشالاي الاسىزدار. ال ساعات 18:00-دە قازاقستاننىڭ ماڭداي الدى بالەت ۇجىمدارى وزىق قويىلىمدارىن مادەنيەت جانە سپورت مينيسترلىگىنىڭ You Tube ارناسى مەن bizbirgemiz_culture ينستاگرام پاراقشاسىندا تارتۋ ەتەدى.

20:00 دە تانىمال انشىلەرىمىزدىڭ مادەنيەت جانە سپورت مينيسترلىگىنىڭ التىن قورىنداعى كونتسەرتى مەن وپەرا مايتالماندارىنىڭ ونەرىنە مادەنيەت جانە سپورت مينيسترلىگىنىڭ You Tube ارناسى مەن bizbirgemiz_culture ينستاگرام پاراقشاسىنان كۋا بولا الاسىزدار.

ايتا كەتەيىك، كارانتين كەزىندە كوپشىلىكتىڭ جوعارى باعاسىنا يە بولعان مادەنيەت جانە سپورت مينيسترلىگى مەن «قازاق تەلەكوم» ا ق- مەن بىرلەسىپ ازىرلەگەن «كارانتيندەگى جۇلدىز» ونلاين-جوباسى اياقتالدى.

اۆتور: مارلان جيەمباي