قازىر كيىك تولدەپ، قۇرالايىن ورگىزەتىن ءسات: مينيستر ەلىمىزدە قانشا كيىك بار ەكەنىن ايتتى

نۇر- سۇلتان. قازاقپارات – ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ قازاقستانداعى كيىك سانىن ايتتى، دەپ حابارلايدى قازاقپارات.

«تابيعات زاڭى ەشقاشان ءوز داستۇرىنەن جاڭىلعان ەمەس. ءدال وسى كەزەڭ كيىك تولدەپ، قۇرالايىن ورگىزەتىن ءسات. مامىردىڭ باسىندا باستالىپ، بىرنەشە اپتاعا سوزىلاتىن قازاق ايتاتىن «قۇرالايدىڭ سالقىنى» كەلىپ جەتتى. وتكەن جىلى سايىن دالامىزدا 335 مىڭ كيىك ەسەپكە الىندى. وكىنىشكە قاراي، بيىل كيىك سانىن اۋەدەن كوكتەمگى ساناۋ توتەنشە جاعداي رەجىمىنە بايلانىستى كەيىنگە شەگەرىلدى. بۇل جۇمىس كۇزدە جالعاسادى»، - دەپ جازادى ماعزۇم مىرزاعالييەۆ Twitter پاراقشاسىندا.

ونىڭ ايتۋىنشا، قازىر ينسپەكتورلار كيىك ءتولىن ورگىزەتىن جەرلەردى ايرىقشا قورعاۋعا كىرىسكەن. «كۇش قۇرىلىمدارمەن بىرگە براكونەرلىكتى بولدىرماۋ ماقساتىنداعى «كيىك» كەڭ اۋقىمدى اكتسياسى ىسكە اسىرىلۋدا. ماماندار دا اقبوكەندەردىڭ حال- احۋالىن ءجىتى قاداعالاپ وتىر. تابيعات ءوز پەرزەنتىنە مەيىرىمىن توگىپ، ماڭ دالاداعى كيىك سانى كوبەيە تۇسەدى دەپ ۇمىتتەنەمىن»، - دەيدى مينيستر.