ەلوردادا قانداي كاسىپورىندار مەن ۇيىمداردىڭ جۇمىسى جاندانادى

نۇر- سۇلتان. قازاقپارات - نۇر- سۇلتان قالاسى اكىمىنىڭ ورىنباسارى باقتيار ماكەن استانادا جۇمىسى جانداناتىن كاسىپورىندار مەن ۇيىمداردى اتادى، دەپ حابارلايدى قازاقپارات ءتىلشىسى.

«ەلوردادا ازىق- تۇلىك ساتپايتىن بازارلاردىڭ جۇمىسى قايتادان قالپىنا كەلەدى. ءبىراق ولار مىندەتتى تۇردە سانيتارلىق جانە دەزينفەكسيالىق تالاپتاردى ساقتاۋى كەرەك. بيزنەس- ورتالىقتاردىڭ، ساقتاندىرۋ كومپانيالارىنىڭ، ادۆوكاتتىق قىزمەتتەردىڭ، نوتاريۋس، جىلجىمايتىن مۇلىك بويىنشا اگەنتتىكتەردىڭ دە جۇمىسى جاندانادى. سپورتتىق نىساندار وقۋ- جاتتىعۋ پروتسەستەرى ءۇشىن 30 ادامعا دەيىنگى ارنايى توپپەن جۇمىس جۇرگىزە الادى. مادەنيەت جانە رەپەتيتسيانىڭ جەكەلەگەن توپتارى دا 30 ادامعا دەيىن جۇمىس ىستەۋىنە رۇقسات. حالىققا قىزمەت كورسەتەتىن تيپوگرافيا، تىگىن اتەلەسى، اياق كيىم شەبەرحاناسى، حيميالىق تازارتۋ مەن ادامدار جينالمايتىن وزگە دە نىساندار جۇمىسىن باستايدى. سونىمەن قاتار حالىققا قىزمەت كورسەتۋ ورتالىقتارىنىڭ جۇمىسى جاندانادى. ءبىراق وندا ادامداردىڭ كەزەك ساقتاۋدا سانيتارلىق تالاپتارىنىڭ ءبارى ساقتالۋى كەرەك»، - دەدى باقتيار ماكەن و ك ق- دا وتكەن باسپا ءسوز ءماسليحاتىندا.

قالا اكىمىنىڭ ورىنباسارى ماسەلەن ەكىنشى دەڭگەيلى بانكتەردە ازاماتتار ەكى مەترلىك قاشىقتىقتى ساقتاۋى كەرەكتىگىن ايتىپ ءوتتى. «تولىعىمەن سانەپيدەميولوگيالىق تالاپتاردىڭ ءبارىن ساقتاۋ ءۇشىن مەكتەپكە دەيىنگى ۇيىمدار، بالاقباقشالار ءۇشىن ارنايى الگوريتم ازىرلەدىك. ءبىلىم ورتالىقتارى مەن ۇيىرمەلەر جۇمىسىن جۇرگىزۋ ءۇشىن قىزمەتكەرلەر مەن بالالاردىڭ جاعدايىن قاتاڭ باقىلاۋدا ۇستاۋى كەرەك. جرۆي بەلگىسى بار بالالار ونداي ورتالىقتار مەن ۇيىرمەلەرگە كىرگىزىلمەۋى ءتيىس. بالالار كابينەتتەرى مەن كوررەكتسيالار الدىن الا جازىلۋ بويىنشا جۇمىس ىستەيدى»، - دەدى ول.

باقتيار ماكەن سونىمەن قاتار مەكتەپتەردە، كوللەدجدەر مەن جوو- لاردا قاشىقتان وقىتۋ ءتارتىبى ساقتالاتىنىن جەتكىزدى. «وقۋ جىلىنىڭ سوڭىنا دەيىن قاشىقتان وقىتۋ جۇيەسى كۇشىندە قالادى»، - دەدى ول.

اۆتور: ايان بەكەن ۇلى