پرەزيدەنت بيولوگيالىق قاۋىپسىزدىك جونىندەگى كەڭەس قۇرۋدى تاپسىردى
بۇل تۋرالى توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ قورىتىندى وتىرىسىندا مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«COVID-19 جانە سوعان ۇقساس ۆيرۋستار ءبىر رەتتىك قۇبىلىس ەمەس سياقتى. سوندىقتان بىزگە پراكتيكالىق تۇرعىدا عانا ەمەس، سونىمەن بىرگە عىلىمي كوزقاراس تۇرعىسىنان دا ۇنەمى دايىن بولۋ قاجەت. ۇكىمەتكە بەدەلدى عالىمدار مەن ساراپشىلاردى تارتا وتىرىپ، بيولوگيالىق قاۋىپسىزدىك جونىندەگى كەڭەس قۇرعانى ءجون»، - دەدى مەملەكەت باسشىسى.
ق ر پرەزيدەنتىنىڭ پايىمىنشا، ءبىلىمدى بارىنشا يكەمدى جاساپ، بالالار مەن ستۋدەنتتەردى قاشىقتان وقىتۋ رەجيمىنىڭ حاتتامالارى مەن ادىستەمەلەرىن ازىرلەۋ، ەلىمىزدىڭ بارلىق وقۋ ورىندارىن شىنايى سيفرلاندىرۋدى اياقتاۋ قاجەت.
«زاماناۋي قاشىقتان وقىتۋ تەحنولوگيالارىن قارقىندى ەنگىزۋ قاجەت. ءبىلىم بەرۋ باعدارلامالارىنىڭ مازمۇنىن قايتا قاراپ شىعىپ، ولاردى قولجەتىمدى جانە ينتەراكتيۆتى جاساۋ كەرەك. پەداگوگتەردىڭ ءوزىن دايىنداۋ جاڭا تالاپتار ەسكەرىلە وتىرىپ جۇزەگە اسىرىلۋى ءتيىس» ، - دەدى قاسىم- جومارت توقايەۆ.
