پرەزيدەنت: ىندەتتىڭ ەكىنشى كەزەڭى باستالىپ كەتۋى مۇمكىن

نۇر-سۇلتان. قازاقپارات - ىندەتتىڭ ەكىنشى كەزەڭى باستالىپ كەتۋى مۇمكىن.

بۇل تۋرالى مەملەكەت باسشىسى قاسىم- جومارت توقايەۆ توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ وتىرىسىندا ءمالىم ەتتى، دەپ حابارلايدى قازاقپارات.

«ىندەتتىڭ ەكىنشى كەزەڭى باستالىپ كەتۋى مۇمكىن. سوندىقتان، ءوزىمىزدىڭ امان-ساۋلىعىمىزعا، ەڭ الدىمەن، ءوزىمىز جاۋاپتى بولۋىمىز كەرەك. ىندەت قايتا ورشىگەن جاعدايدا ۇكىمەت ناقتى شۇعىل ءىس-قيمىل جوسپارىن دايىندايدى. وزدەرىڭىزگە ءمالىم، مەنىڭ تاپسىرمام بويىنشا ەلىمىزدە داعدارىسقا قارسى شارالاردىڭ ەكى توپتاماسى جۇزەگە اسىرىلۋدا. 4,5 ميلليوننان استام ادامعا 42500 تەڭگە كولەمىندە قارجىلاي كومەك كورسەتىلۋدە. 1 ميلليوننان استام ازاماتقا ازىق-تۇلىك پەن تۇرمىستىق زاتتار ۇلەستىرىلۋدە. كوممۋنالدىق تولەمدەردىڭ ءتاريفى تومەندەتىلدى. ونى تولەۋ ءۇشىن اسا مۇقتاج جاندار قوسىمشا كومەك الادى»، - دەدى پرزيدەنت.

وسى ورايدا مەملەكەت باسشىسى 2 ميلليونعا جۋىق ازاماتتىڭ نەسيە تولەۋ مەرزىمى كەيىنگە شەگەرىلگەنىن ەسكە سالدى.

«قولجەتىمدى نەسيە بەرۋ، كوكتەمگى ەگىس ناۋقانىن جۇرگىزۋ، جۇمىس ورىندارىن اشۋ جانە ساقتاۋ ءۇشىن ايتارلىقتاي قاراجات ءبولىندى. 700 مىڭنان استام كومپانيا مەن كاسىپكەرلەر ءۇشىن سالىق جۇكتەمەسى ازايتىلدى. سول ارقىلى ولار 1 تريلليون تەڭگەگە جۋىق قارجى ۇنەمدەۋگە مۇمكىندىك الدى»، - دەدى قاسىم-جومارت توقايەۆ.