تاسقىننان زارداپ شەككەن ماقتاارالدىقتارعا قوعامدىق ۇيىمدار گۋمانيتارلىق كومەك جەتكىزۋدە
ءتۇرلى اپاتتار كەزىندە ازاماتتارعا كومەك كورسەتەتىن « قىزىل جارتى اي» قوعامى باسپاناسىز قالعان وتباسىلارعا ازىق-تۇلىكتەر مەن كيىم-كەشەكتەر تاراتۋدا، دەپ حابارلايدى قازاقپارات ءتىلشىسى. اتالعان قوردىڭ وبلىستىق فيليالىنىڭ ديرەكتورى ماليكا ءجۇنىسوۆانىڭ ايتۋىنشا، ۇيىم وكىلدەرى مەن ەرىكتىلەر تاسقىن بولعان العاشقى كۇننەن باستاپ ءوز كومەكتەرىن كورسەتىپ كەلەدى.
تۇرعىنداردى ەۆاكۋاتسيالىق ورتالىقتارعا كوشىرۋ مەن ولاردىڭ زاتتارىن تاسىمالداۋ شارالارىنا اتسالىسقان.
سونداي-اق، مەكتەپتەر مەن تۋىستارىنىڭ ۇيىنە جايعاسقان وتباسىلارعا قاجەتتى زاتتار ءتىزىمى جاساقتالىپ، ولار دا دەر كەزىندە جەتكىزىلىپ بەرىلۋدە.
«اپات بولعان ايماقتا 300 وتباسىعا العاشقى كومەك رەتىندە ازىق-تۇلىكتەر مەن گيگيەنالىق زاتتار جەتكىزىلىپ بەرىلدى. ونىڭ ىشىندە كورپە-توسەك پەن ازىق-تۇلىكتەر، گيگيەنالىق زاتتار مەن بالالارعا ارنالعان تاعامدار بار. ءبىزدىڭ ەرىكتىلەر ۇنەمى زارداپ شەككەن تۇرعىندارمەن بايلانىسىپ، قاجەت دەگەن زاتتارىمەن قامتاماسىز ەتۋدە. كۇنى بۇگىنگە دەيىن 70 مىڭنان اسا مەديتسينالىق بەتپەردە تاراتىلىپ، جەكەلەگەن ازاماتتار مەن جانۇيالارعا پسيحولوگيالىق قولداۋ كورسەتۋدەمىز»، - دەيدى ماليكا ءجۇنىسوۆا.
