نۇر-سۇلتاندا كارانتين رەجيمى ساقتالادى: بلوكپوستار اشىلمايدى
«11-مامىر كۇنى ەلوردا بۇرىنعىداي كارانتين رەجيمىندە ءومىر سۇرە بەرەدى. سەبەبى كارانتين ءالى الىنعان جوق. بۇل دەگەنىمىز - رۇقسات بەرىلگەن كاسىپورىندار عانا جۇمىسىن باستايدى. بلوكپوستار الىنبايدى (قالادان كىرىپ - شىعۋعا الىدە تيىم سالىنادى) جانە 11-مامىردا قوعامدىق كولىك ىسكە قوسىلمايدى»، - دەپ ءمالىم ەتتى ا. ولجابايەۆا. ەسكە سالايىق، نۇر-سۇلتان اكىمدىگىنىڭ باسپا ءسوز حاتشىسى 11-مامىردان باستاپ كارانتين رەجيمى جۇمسارتىلاتىنى تۋرالى اقپاراتتى تەرىسكە شىعارعان بولاتىن.
«11-مامىر مەن 15-ماۋسىم ارالىعىندا جۇمىسى قايتا باستالاتىن مەكەمەلەر تۋرالى تاراپ جاتقان اقپارات شىندىققا جاناسپايدى. جالعان اقپاراتقا سەنبەۋلەرىڭىزدى سۇرايمىز. بارلىق جاڭالىقتار جەرگىلىكتى اتقارۋشى ورگانداردىڭ رەسمي سايتتارىندا، ال مەملەكەتتىك كوميسسيانىڭ شەشىمى پرەمەر-ءمينيستردىڭ سايتىندا جاريالانادى»، - دەدى ول.
بۇعان دەيىن نۇر-سۇلتان اكىمى التاي كولگىنوۆ 11-مامىردان كەيىن قوعامدىق كولىكتىڭ قوزعالىسى جاندانۋى مۇمكىندىگىن بۇعان دەيىن مالىمدەگەن ەدى.
«ءبىز 11-مامىردان كەيىن قوعامدىق كولىكتەردىڭ قوزعالىسىن جانداندىرۋدى مەملەكەتتىك كوميسسياعا ۇسىنۋدى جوسپارلاپ وتىرمىز. ەپيدەميولوگيالىق احۋالدى دا باقىلايتىن بولامىز. مۇنان ارى ۇستاپ تۇرۋعا بولمايدى. دەگەنمەن، جاڭا تالاپتار بولادى، جۇرگىزۋشى قورشالادى جانە بايلانىستى تومەندەتۋ ءۇشىن قولما- قول اقشاسىز جولاقى تولەۋ قولدانىلادى. جولاۋشىلار ماسكامەن، قولعاپپەن جۇرۋلەرى قاجەت. انتيسەپتيك قولدانعانى ءجون»، - دەگەن ەدى قالا باسشىسى.
