ەرتەڭ توتەنشە جاعداي رەجيمى اياقتالادى، ءبىراق كارانتين ءالى ساقتالادى

نۇر-سۇلتان. قازاقپارات - الەمدى ابىگەرگە سالعان كوروناۆيرۋس ىندەتىنىڭ ەلىمىزدە دە بەلەڭ الىپ، ۋشىعا تۇسۋىنە جول بەرمەۋ ماقساتىندا مەملەكەت باسشىسى قاسىم-جومارت توقايەۆتىڭ جارلىعىمەن رەسپۋبليكادا توتەنشە جاعداي ەنگىزىلگەنىنە دە ەكى ايعا جۋىق ۋاقىت بولدى.

بۇل ازاماتتاردىڭ قاۋىپسىزدىگىن قامتاماسىز ەتۋ ءۇشىن ۋاقىتشا قابىلدانعان ءماجبۇرلى شارا ەدى. ەرتەڭ، 11-مامىردا ەلىمىزدە توتەنشە جاعداي رەجيمى الىنادى.

«ءبىز دەر كەزىندە قولعا الىنعان شارالاردىڭ ارقاسىندا كوروناۆيرۋس ىندەتىنىڭ جاپپاي تارالۋىنا توسقاۋىل قويدىق. مۇنى دۇنيەجۇزىلىك دەنساۋلىق ساقتاۋ ۇيىمى، حالىقارالىق ساراپشىلار جوعارى باعالادى. پاندەميا ەل ەكونوميكاسىنا كەرى اسەرىن تيگىزىپ وتىر. وسىعان قاراي، ۇكىمەت ازاماتتارعا، شاعىن جانە ورتا بيزنەس وكىلدەرىنە قولداۋ كورسەتۋدە. بيۋدجەتتەن قوماقتى قاراجات ءبولىندى. تابىسىنان ايىرىلعان ادامدار قارجىلاي كومەك الىپ جاتىر. مۇنىڭ ءبارى حالىقتىڭ تۇرمىس جاعدايىن تومەندەتپەۋ ءۇشىن جاسالۋدا. قابىلدانعان شارالار ءوز ناتيجەسىن بەرە باستاعانىن كورىپ وتىرمىز. جاعداي كۇردەلەنىپ كەتپەسە، توتەنشە جاعداي رەجيمى ون ءبىرىنشى مامىردا اياقتالادى»، - دەگەن ەدى ق ر پرەزيدەنتى قاسىم-جومارت توقايەۆ 4-مامىر كۇنى پارلامەنت سەناتىنىڭ وتىرىسىندا سويلەگەن سوزىندە.

ءبىراق بۇل كارانتين شارالارىن دا تولىق الىپ تاستايىنىن بىلدىرمەيدى. قاۋىپسىزدىك شارالارى الداعى ۋاقىتتا دا قاتاڭ ساقتالۋى شارت. بۇل ەڭ الدىمەن ەلىمىزدىڭ تۇرعىندارىنىڭ قاۋىپسىزدىگىن قامتاماسىز ەتۋ ءۇشىن اسا قاجەت. ويتكەنى، كوروناۆيرۋس ىندەتىنىڭ تارالۋى باسەڭدەگەنىمەن كۇن سايىن ەلىمىزدىڭ ءار جەرىنەن ۆيرۋس جۇقتىرىپ العانداردىڭ تىركەلىپ جاتقانى بار.

ايتالىق، بۇگىننىڭ وزىندە كوروناۆيرۋس ينفەكسياسىن جۇقتىرعان تاعى 81 ادام نۇر-سۇلتان، الماتى قالالارىندا، جامبىل، ماڭعىستاۋ، اقمولا، قىزىلوردا، باتىس قازاقستان، اتىراۋ، جانە قاراعاندى وبلىستارىندا انىقتالىپ، ەلىمىزدە ىندەتكە شالدىققانداردىڭ سانى 5000 ادامنان اسىپ وتىر.

وكىنىشكە قاراي، 31 ادام كوز جۇمدى. ال قازاقستان بويىنشا جازىلعان ادامدار سانى 1800 دەن اسىپ جىعىلادى.

جالپى، كارانتين رەجيمى وسى ۋاقىتقا دەيىن بىرنەشە رەت جەڭىلدەتىلدى. ماسەلەن، ق ر پرەزيدەنتى جانىنداعى توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ شەشىمىمەن 4-مامىردان باستاپ وڭىرلەردە اۋماعى 500 شارشى مەترگە دەيىن بولاتىن ازىق- تۇلىكتىك ەمەس دۇكەندەر ساعات 17:00 گە دەيىن (بارلىق تۇرلەرى)، فوتوسالوندار، گۇل ساتاتىن دۇڭگىرشەكتەر، شاشتارازدار (جازىلۋ بويىنشا)، مەديتسينا ورتالىقتارى (جازىلۋ بويىنشا)، ستوماتولوگيالىق كلينيكالار (جازىلۋ بويىنشا)، جىلجىمايتىن مۇلىكپەن وپەراتسيالاردى جۇزەگە اسىراتىن كومپانيالار، جارناما اگەنتتىكتەرى، ادۆوكاتتار، نوتاريۋستار، شاعىن قارجى ۇيىمدارى، ساقتاندىرۋ كومپانيالارى، لومباردتار، ايىرباستاۋ پۋنكتتەرى، اقپاراتتىق-كوممۋنيكاتسيالىق تەحنولوگيالار كومپانيالارى جۇمىسقا كىرىستى.

بۇل رەتتە اتالعان جۇمىسىن جانداندىرعان مەكەمەلەر سانيتارلىق- ەپيدەميولوگيالىق تالاپتاردى قاتاڭ ساقتاپ، قىزمەتكەرلەرىن، جۇمىسشىلارىن قاجەتتى قورعانىس قۇرالدارىمەن قامتاماسىز ەتىپ، عيمارات ىشىندە انتيسەپتيكتەر قويۋى قاجەت.

سونىمەن قاتار، دالادا سپورتپەن شۇعىلدانىپ، جاتتىعۋ جاساۋعا، بالالاردىڭ اۋلادا ويناۋىنا رۇقسات ەتىلدى. مۇنان بولەك، الدىمەن نۇر-سۇلتان مەن الماتى اراسىندا اۋە قاتىناسى جانداندى. كەيىننەن نۇر- سۇلتان مەن الماتىدان قىزىلورداعا، پەتروپاۆلعا، وسكەمەنگە جانە سەمەيگە اۋە قاتىناستارىن قايتا جانداندىرۋ تۋرالى شەشىم قابىلداندى. ال 11-مامىردا نۇر-سۇلتان مەن الماتى قالالارىنان قاراعاندى، اقتوبە، پاۆلودار، قوستاناي، كوكشەتاۋ، تاراز، تالدىقورعان قالالارىنا اۋە قاتىناستارى جاندانادى.

ايتا كەتەرلىگى، ق ر كولىكتەگى باس مەملەكەتتىك سانيتار دارىگەر ءسادۋاقاس بايعابىلوۆ ىشكى اۋە رەيستەرىندە سانيتارلىق كارانتيندىك باقىلاۋدى كۇشەيتۋ تۋرالى ءتيىستى قاۋلى قابىلداعان بولاتىن. اتالعان قاۋلىعا سايكەس، ىشكى اۋە رەيستەرى قايتا جاندانعاننان كەيىن نەگىزگى سانيتارلىق- ەپيدەميولوگيالىق تالاپتار قاتاڭ ساقتالۋى ءتيىس.

«COVID-19 تەستىنەن جانە جەكە قورعانۋ قۇرالدارىنان وتكەنى تۋرالى انىقتاما (بەرىلگەن كۇننەن باستاپ 14 كۇن، پ ت ر - زەرتتەۋ) بولعان جاعدايدا قىزمەتكەرلەردى جۇمىسقا جىبەرۋدى؛ دەنە تەمپەراتۋراسىن ولشەي وتىرىپ، قىزمەتكەرلەردىڭ اۋىسىم الدىنداعى مەديتسينالىق تەكسەرۋدەن وتكىزۋدى؛ COVID-19 تەستىنەن وتكەنى تۋرالى انىقتاما بولعان كەزدە عانا جولاۋشىلاردى تىركەۋدى جانە وتىرعىزۋدى (انىقتامانىڭ قولدانىلۋ مەرزىمى بەرىلگەن كۇننەن باستاپ 7 كۇن، پ ت ر- زەرتتەۋ)؛ اۋە كەمەسىنەن تىركەۋدەن، وتىرعىزۋدان جانە تۇسىرۋدەن ءوتۋ كەزىندە جولاۋشىلار اراسىنداعى قاۋىپسىز قاشىقتىقتى ساقتاۋدى (1 مەتر) قامتاماسىز ەتۋى كەرەك»، - دەلىنگەن قاۋلىدا. بۇدان بولەك، اۋەجايدان ۇشىپ شىققان كەزدە نۇر-سۇلتان، الماتى، اقتوبە، قاراعاندى، قوستاناي، كوكشەتاۋ، تاراز، تالدىقورعان جانە پاۆلودار قالالارىنىڭ اۋەجاي باسشىلارى COVID-19 تەستىنەن وتكەنى تۋرالى انىقتاما جانە جەكە قورعانۋ قۇرالدارى بولعان جاعدايدا قىزمەتكەرلەردى جۇمىسقا جىبەرىلۋىن، جولاۋشىلار اراسىنداعى قاۋىپسىز اراقاشىقتىقتىڭ ساقتالۋىن قامتاماسىز ەتۋى كەرەك. سونىمەن قاتار، اۋەجايلارعا وزگە دە ءتيىستى تالاپتاردى ورىنداۋ جۇكتەلىپ وتىر.

جوعارىدا ايتقانىمىزداي، ەرتەڭ، 11-مامىر كۇنى ەلىمىزدە توتەنشە جاعداي رەجيمى الىنىپ تاستالادى.

سوعان بايلانىستى كارانتين شارالارى دا بوساڭداتىلۋى مۇمكىن. مۇنداي شەشىمدى ق ر پرەزيدەنتى جانىنداعى توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيا قابىلدايتىندىعى بەلگىلى.

اۆتور: مارلان جيەمباي