التاي كولگىنوۆ ەلوردادا اۆتوبۋستار قاشان قاتىنايتىنىن ايتتى

«ءبىز 11 - مامىردان كەيىن قوعامدىق كولىكتەردىڭ قوزعالىسىن جانداندىرۋدى مەملەكەتتىك كوميسسياعا ۇسىنۋدى جوسپارلاپ وتىرمىز. ەپيدەميولوگيالىق احۋالدى دا باقىلايتىن بولامىز. مۇنان ارى ۇستاپ تۇرۋعا بولمايدى. دەگەنمەن، جاڭا تالاپتار بولادى، جۇرگىزۋشى قورشالادى جانە بايلانىستى تومەندەتۋ ءۇشىن قولما- قول اقشاسىز جولاقى تولەۋ قولدانىلادى. جولاۋشىلار ماسكامەن، قولعاپپەن جۇرۋلەرى قاجەت. انتيسەپتيك قولدانعانى ءجون»، - دەدى قالا باسشىسى.

ەلوردا اكىمىنىڭ ايتۋىنشا، قازىرگى ۋاقىتتا قالا ءدارىحانالارىندا قورعانىس قۇرالدارى بار. ولارعا 5 ميلليون ماسكا جەتكىزىلدى. مۇنان بولەك، تۇرمىسى تومەن ادامدارعا 2 ميلليون ماسكا تەگىن تاراتىلدى. «بۇعان قوسا، حالىققا قىزمەت كورسەتۋ ورتالىقتارىنىڭ جۇمىسىن دا جانداندىرۋدى كوزدەپ وتىرمىز. ول جەردە دە جاڭا تالاپ - ارا- قاشىقتىق 1,5-2 مەتر بولۋى ءتيىس. ونى سىزىپ تا قويدىق. مۇنى ارناۋلى حالىققا قىزمەت كورسەتۋ ورتالىقتارىندا، بانكتەردە، ازىق- تۇلىك، ازىق- تۇلىككە جاتپايتىن تاۋارلار، قۇرىلىس زاتتارى دۇكەندەرىندە بەيىمدەۋدەن وتكىزدىك. ياعني، ءبىز كەزەكتە تۇرىپ ۇيرەنۋىمىز قاجەت. ءوزىمىزدى قورعاۋ ءۇشىن الەۋمەتتىك ارا قاشىقتىقتى ساقتاۋعا ءتيىسپىز. بۇل دا ماڭىزدى مادەنيەت»، - دەدى التاي كولگىنوۆ.

اۆتور: مارلان جيەمباي