كوروناۆيرۋسقا كىمدەر تەگىن تەست تاپسىرا الادى
الەۋمەتتىك جەلىدە ونلاين رەجيمدە وتكەن باسپا ءسوز ءماسليحاتىندا مىندەتتى الەۋمەتتىك مەديتسينالىق ساقتاندىرۋ بويىنشا ساقتاندىرىلعان ادامدار كوروناۆيرۋسقا تەستىنى قاشان تاپسىرا الاتىندىعى تۋرالى ساۋال جولداندى.
«كوروناۆيرۋس اسا قاۋىپتى ينفەكتسيالار توبىنا جاتادى. سايكەسىنشە، ەلدە ءتيىستى شارالار قابىلدانادى. قازىرگى كەزدە تەستىلەر تاپسىرۋ مۇمكىندىگى جۇزەگە اسىرىلعان. ءتيىستى قارجى باستاپقى مەديتسينالىق- سانيتارلىق كومەك كورسەتەتىن ۇيىمدارعا جەتكىزىلدى. اۋرۋ بەلگىلەرى بايقالسا، ياعني دەنە قىزۋىنىڭ كوتەرىلۋى، قۇرعاق جوتەل جانە باسقا دا بەلگىلەر كەزىندە باستاپقى مەديتسينالىق- سانيتارلىق كومەك دەڭگەيىندە تەستىلەۋ جۇرگىزۋگە بولادى. سونىمەن قاتار، ەگەر ادام پروۆيزورلىق، ينفەكتسيالىق نەمەسە كارانتيندىك ستاتسيونارعا تۇسسە، وندا ەمدەۋ حاتتاماسى بويىنشا اتالعان تەستىلەردى تولىقتاي تەگىن وتەدى»،- دەدى م. شورانوۆ.
وسى ورايدا ول بۇگىندە تەستىدەن ءوتۋ مۇمكىندىگى قامتاماسىز ەتىلگەنىن ايتتى.
«جالپى، باس سانيتارلىق دارىگەرىنىڭ قاۋلىسى بويىنشا مىندەتتى تۇردە تەستىلەۋدەن وتەتىن پاتسيەنتتەر ساناتى بار. بۇل تۇرعىدا جۇكتى ايەلدەر، سونداي- اق ەندوكريندى، كارديولوگيالىق ءارى پۋلمونولوگيالىق بولىمدەرگە تۇسەتىن ادامدار قامتىلعان»، - دەدى مارات شورانوۆ.
