توقايەۆ مەدقىزمەتكەرلەردىڭ مارتەبەسى تۋرالى ءوز ويىن ايتتى

نۇر-سۇلتان. قازاقپارات - كوروناۆيرۋس ىندەتى مەديتسينا عىلىمىن دامىتۋدىڭ دا وزەكتى ەكەنىن كورسەتىپ بەردى.

بۇل تۋرالى مەملەكەت باسشىسى قاسىم-جومارت توقايەۆ بۇل تۋرالى ق ر پرەزيدەنتى قاسىم- جومارت توقايەۆ «Egemen Qazaqstan « گازەتىنە بەرگەن سۇحباتىندا ايتتى، دەپ حابارلايدى قازاقپارات.

«بارشا جۇرتقا قاۋىپ توندىرگەن ىندەتتى اۋىزدىقتاۋ ءۇشىن، ەڭ الدىمەن، دارىگەرلەر مەن مەديتسينا قىزمەتكەرلەرى جۇمىلدىرىلدى. ولارعا جان- جاقتى قولداۋ كورسەتۋدىڭ ماڭىزى زور. بيلىك تاراپىنان بارىنشا جاعداي جاسالۋدا. وكىنىشكە قاراي ىندەتپەن كۇرەس بارىسىندا مەديتسينا جۇيەسىنىڭ وسال جاقتارى دا انىقتالدى. ساقتىق شارالارىنا قاراماستان، كوپتەگەن مەديتسينا قىزمەتكەرى ۆيرۋس جۇقتىرىپ الدى. دارىگەرلەرىمىز ونسىز دا جەتپەي جاتقاندا، وسىنداي قيىندىققا تاپ بولدىق. بۇل جاعداي تىكەلەي باقىلاۋىمدا. ناقتى تاپسىرمالار بەرىلدى. ىندەتپەن كۇرەسۋگە اتسالىسقان دارىگەرلەرگە ءتيىستى ۇستەمەاقى تولەنۋدە» - دەدى پرەزيدەنت.

سونىمەن قاتار، مەملەكەت باسشىسى قازىرگى ۋاقىتتا مەديتسينا قىزمەتكەرلەرىنىڭ مارتەبەسىن ارتتىرۋ وزەكتى ماسەلەگە اينالعاندىعىن ايتتى.

«دارىگەرلەرگە بەرىلەتىن الەۋمەتتىك كەپىلدىك اياسىن كەڭەيتىپ، ىنتالاندىرۋ جۇيەسىن جەتىلدىرۋ قاجەت. پاندەميا دەنساۋلىق ساقشىلارىنا قولداۋ كورسەتۋدىڭ اسا ماڭىزدى ەكەنىن اڭعارتتى. ءبىز تاۋەلسىزدىك العالى بەرى بۇل سالاعا ءمان بەرىپ كەلەمىز. دەگەنمەن ءالى دە اتقاراتىن جۇمىستار از ەمەس. كوروناۆيرۋس ىندەتى مەديتسينا عىلىمىن دامىتۋدىڭ دا وزەكتى ەكەنىن كورسەتىپ بەردى. قازىر بۇكىل الەم وسى سالاعا ەرەكشە نازار اۋدارىپ، جۇقپالى اۋرۋلارمەن كۇرەستى كۇشەيتۋدە. بۇل - زاڭدى قۇبىلىس. الداعى ۋاقىتتا ەلىمىزدە مەديتسينالىق- بيولوگيالىق زەرتتەۋلەرگە ەرەكشە كوڭىل بولىنەدى. ويتكەنى ايبىندى اسكەرمەن بىرگە مىقتى مەديتسينا دا - مەملەكەتتىڭ نەگىزگى قالقانى. بۇدان بىلاي ونىڭ وزەكتىلىگى ارتا تۇسەتىنى ءسوزسىز. جاقىندا نۇر- سۇلتان قالاسىندا مودۋلدىك جۇقپالى اۋرۋلار اۋرۋحاناسى اشىلدى. ونىڭ نەبارى ەكى اپتا ىشىندە سالىنعانىن بىلەسىزدەر. اۋرۋحانا حالىقارالىق تالاپتارعا ساي جابدىقتالعان. ونى ارنايى بارىپ ارالاپ كوردىم. سونىمەن قاتار عالىمدارىمىز دياگنوستيكالىق تەست جۇيەسىن ازىرلەپ شىقتى. مىنە، وسىنداي ناقتى جۇمىستار سالانى جەتىلدىرە تۇسەتىنى ءسوزسىز. دەنساۋلىق ساقتاۋ مينيسترلىگى الداعى ۋاقىتتا دا مەديتسينالىق قىزمەت ساپاسىن ارتتىرۋ ءۇشىن اۋقىمدى ءارى جۇيەلى جۇمىس جۇرگىزۋى كەرەك»، - دەپ اتاپ ايتتى توقايەۆ.