ماقتاارال اۋدانىندا تاعى ءبىر اۋىلدى سۋ باستى

«بۇگىن تاڭعى 05.00-تەن باستاپ 250 ءۇيى سۋعا باتقان فەردوۋسي اۋىلى باعىتىنان جاڭاجول اۋىلدىق وكرۋگىنىڭ ورگەباس ەلدىمەكەنىنە قاراي سۋ كەلە باستادى. ەكى اۋىلدىڭ ارا قاشىقتىعى - 3 شاقىرىم. تاڭعى 8.00-دە سۋ ورگەباس ەلدى مەكەنىنىڭ 194 ءۇيىن باسىپ قالدى. اۋىلدىڭ 1451 تۇرعىنى ەۆاكۋاتسيالاندى. كوشىرۋ بارىسىندا زارداپ شەككەندەر جوق» دەلىنگەن حابارلامادا.

ايتا كەتەيىك، توتەنشە جاعداي قالىپتاسقان ماقتاارال اۋدانىندا سۋ دەڭگەيى تومەندەيتىن ءتۇرى جوق. قايتا سۋ باسقان اۋىلدار سانى كوبەيىپ بارادى. باستاپقىدا ءتورت ەلدىمەكەننىڭ حالقى قاۋىپسىز جەرگە كوشىرىلسە، تۇندە اۋدان ورتالىعىنان 12 مىڭداي ادام ەۆاكۋاتسيالانعان.

ەستەرىڭىزگە سالا كەتەيىك، 1- مامىردا ساردوبا سۋ قويماسى بوگەتىن سۋ شايىپ كەتۋىنە بايلانىستى وزبەكستاننىڭ سىرداريا وبلىسىنداعى ەلدىمەكەندى سۋ باستى. سونىڭ سالدارىنان ماقتاارال اۋدانىندا شەكارا ماڭىنداعى بىرنەشە كوللەكتور سۋعا تولىپ قالعان. ماقتاارالداعى ورتالىق كوللەكتوردان سۋ سىرتقا جايىلىپ، جەڭىس، جاڭا تۇرمىس اۋىلدارىن سۋ الىپ كەتتى. وبلىستىق ماڭىزى بار «مىرزاكەنت - جەڭىس - جاڭا تۇرمىس» اۆتوموبيل جولىن سۋ باسىپ، كولىك جۇرە الماي وتىر. ءتورت اۋىلدان 5400 ادام قاۋىپسىز جەرگە كوشىرىلگەن. سونداي- اق تۇركىستان وبلىسىندا سۋ تاسقىنى قاۋپى تونگەن 3 اۋىلدىڭ حالقى ەۆاكۋاتسيالانىپ جاتىر. وبلىس اكىمى ءومىرزاق شوكەيەۆ حالىقتى سابىرعا شاقىرىپ، توتەنشە جاعدايدى رەتتەۋگە ايماقتىڭ تولىق مۇمكىندىگى بار ەكەنىن ايتتى.

اۆتور: اينۇر اقبايەۆا