الماتىدا قۇمبەل شىڭىندا اداسىپ كەتكەن ەكى ادام قۇتقارىلدى

مامانداردىڭ ايتۋىنشا، قازىر مامىر ايى بولعانىمەن تاۋداعى اۋا رايى قۇبىلمالى. 1- مامىردا ەر ادام تاۋعا سەرۋەندەپ شىققان. كۇن جىلى بوپ تۇرعان. تۇستەن كەيىن كۇن كۇرت بۇزىلىپ، قار ارالاس جاۋىن جاۋا باستاعان. قۇمبەل شىڭىنا جەتپەستەن ەر ادام كەرى قايتپاق بولادى. ءبىراق قايتار جولدان اداسىپ كەتەدى. ءتۇسىپ كەلە جاتىپ تانىسىنا حابارلاسقان. تۇنگە جۋىق ولار كەزدەسەدى. الايدا اياعى اۋىرىپ، تومەن تۇسە الماعان. مالمانداي سۋ بولىپ، توڭعان جىگىتتەر قۇتقارۋ جاساعىنىڭ كەزەكشى پۋلتىنە حابارلاسقان.

ولاردى قۇتقارۋعا كينولوگتار شىقتى. قۇتقارۋ جاساعى شىققاندا ءتۇن ىشىندە قار تىزەدەن اسىپ كەتكەن ءارى اۋا تەمپەراتۋراسى 10- گرادۋس شاماسىندا بولعان. وسىنداي ساتتە كوشكىن ءجۇرۋ قاۋپى بارىن ەسكەرگەن قۇتقارۋشىلار ابايلاپ جۇرۋگە ءماجبۇر بولدى. از ۋاقىتتان سوڭ قۇتقارۋشىلار اداسقانداردىڭ فونار جارىعىن بايقاعان. الىستان حابارلاسىپ، نە ىستەۋ كەرەكتىگىن تۇسىندىرگەن. ەر ادامدار قاتتى توڭىپ، قاردا وتىرعان جەرىندە تابىلدى. قۇتقارۋشىلار وت جاعىپ جىلىتتى. ودان كەيىن اياعى اۋىرعان جىگىتتى تاۋدان ءتۇسىرىپ، مەديتسينا ماماندارىنا تابىستادى.

اۆتور: گۇلميرا عوسمانالي