ءومىرزاق شوكەيەۆ ماقتاارالدىقتاردى سابىرعا شاقىردى

ۆيدەودا تۇركىستان وبلىسىنىڭ اكىمى جاعدايدى ءتۇسىندىرىپ، تۇرعىنداردى ۇرەيگە بوي الدىرماي، سابىر ساقتاۋعا شاقىرادى.

«وزبەكستان تاراپىمەن سويلەستىم. ول جاقتا قويمادان شىققان سۋ توقتاتىلعان. ماقتاارالداعى كوللەكتوردىڭ قۋاتى - سەكۋندىنا 120 تەكشە مەتر. الايدا تۇنىمەن سەكۋندىنا 180 تەكشە مەتردەن سۋ اعىپ، اۋىلداردى سۋ باسىپ قالعان. 4 ەلدىمەكەننەن 5400 ادام كوشىرىلدى. ولارعا ءتيىستى كومەك كورسەتىلىپ، قاجەتتى زاتتارمەن قامتاماسىز ەتىلەدى. قازىر ءبىز سۋ باسقان وڭىرلەردى قايتادان ارالاپ، تەكسەرىپ شىعامىز. سۋ باسۋ قاۋپى سەيىلسە، حالقى كوشىرىلگەن ۇيلەردى كۇزەتكە الامىز. مۇلكىن، مالىن پوليتسيا قورعايدى. مال مەن ادام شىعىنى جوق. سۋ دەڭگەيى ءالى دە كوتەرىلسە، تاعى 4 ەلدى مەكەننىڭ حالقىن ەۆاكۋاتسيالايمىز. ول - نۇرلى جول، فەرداۋسي، جانتاقساي جانە جايلىباي اۋىلدارى. قازىر دۇرلىگىپ، ۇرەيلەنبەڭىزدەر. ءبارى رەتتەلەدى. جەرگىلىكتى اۋقىمداعى توتەنشە جاعدايدى رەتتەۋگە وبلىستىق تولىق مۇمكىندىگى بار»، - دەيدى ءومىرزاق شوكەيەۆ.

ەستەرىڭىزگە سالا كەتەيىك، 1- مامىردا ساردوبا سۋ قويماسى بوگەتىن سۋ شايىپ كەتۋىنە بايلانىستى وزبەكستاننىڭ سىرداريا وبلىسىنداعى ەلدىمەكەندى سۋ باستى. سونىڭ سالدارىنان ماقتاارال اۋدانىندا شەكارا ماڭىنداعى بىرنەشە كوللەكتور سۋعا تولىپ قالعان. ماقتاارالداعى ورتالىق كوللەكتوردان سۋ توگىلىپ، جەڭىس، جاڭا تۇرمىس اۋىلدارىن سۋ الىپ كەتتى. وبلىستىق ماڭىزى بار «مىرزاكەنت - جەڭىس - جاڭا تۇرمىس» اۆتوموبيل جولىن سۋ باسىپ، كولىك جۇرە الماۋدا. سونداي- اق تۇركىستان وبلىسىندا سۋ تاسقىنى قاۋپى تونگەن 3 اۋىلدىڭ حالقى ەۆاكۋاتسيالانىپ جاتىر.

سونداي-اق، تۇركىستان وبلىسى ماقتاارال اۋدانىنداعى قالىپتاسقان توتەنشە جاعدايدى وبلىس اكىمى ءومىرزاق شوكەيەۆ اۋەدەن باقىلاپ كوردى. ايماق باسشىسى وبلىستىق ت ج د باستىعى نۇرعالي جۇنىسوۆپەن بىرگە قاۋىپتىڭ الدىن الۋ ماسەلەلەرىن تالقىلادى.