كوروناۆيرۋسقا تەست مەديتسينالىق ساقتاندىرۋ بويىنشا نەگە تەگىن جاسالمايدى: مينيستر ءتۇسىندىردى

بۇل جايىندا ق ر دەنساۋلىق ساقتاۋ ءمينيسترى ەلجان ءبىرتانوۆ Facebook-پاراقشاسىندا جازدى، دەپ حابارلايدى قازاقپارات ءتىلشىسى.

ايتا كەتەيىك، Facebook-تە ۆەرا زاحارچۋك ەسىمدى جەلى قولدانۋشى كوروناۆيرۋستى انىقتايتىن تەست مىندەتتى الەۋمەتتىك مەديتسينالىق ساقتاندىرۋ جۇيەسىنە قاتىسۋشىلارعا نەگە تەگىن بولمايتىندىعىن سۇراپ، جازبا قالدىرعان بولاتىن.

«بۇل ماسەلەنى قازىر عانا تالقىلاۋدى اياقتادىق. وسى ۋاقىتقا دەيىن 4 سانات بويىنشا اتاپ ايتقاندا، شەتەلدەن كەلگەندەرگە، اۋىرعاندار مەن ولارمەن قارىم-قاتىناستا بولعاندارعا، كارانتين كەزىندە دە جۇمىس ىستەپ جاتقاندارعا (دارىگەرلەر، اسكەري قىزمەتشىلەر، كوممۋنالدىق جۇمىسشىلار جانە ت. ب. ) جانە قارتتار ءۇيىنىڭ كونتينگەنتىنە 250 مىڭعا جۋىق تەگىن تەست جۇرگىزدىك. ءىس جۇزىندە 3 جانە 4 ساناتتاعىلاردىڭ 90 پايىزىنا (شامامەن 70 مىڭ ادام) قايتادان تەگىن تەست وتكىزىلدى. جالپى، بۇل وڭاي ەمەس ءارى شىعىنى كوپ. وعان قازىردىڭ وزىندە بيۋدجەتتەن 2,8 ميلليارد تەڭگەگە جۋىق قاراجات جۇمسالدى»، - دەدى ەلجان ءبىرتانوۆ.

وسى رەتتە مينيستر ۇشاقپەن ساپارلارعا بىرنەشە قالاعا عانا بارىنشا ساقتىقپەن رۇقسات بەرىلىپ وتىرعانىن اتاپ وتەدى. «جاعداي بويىنشا قارايتىن بولامىز (ولاردى قايتا توقتاتۋدىڭ قاجەتى بولماس دەپ ۇمىتتىنەمىن. ونى دا جوققا شىعارمايمىز)، ەلىمىزدە ەپيدەميا ءالى اياقتالعان جوق. ءبىراق ەكونوميكانى كەزەڭ- كەزەڭمەن جانداندىرۋ قاجەت»، - دەدى ول.

سونىمەن قاتار ۆەدومستۆو باسشىسى ىندەت بەتى قايتقاننان كەيىن حالىقتى تۇراقتى تەستىلەۋ ءۇش باعىت بويىنشا ۇسىنىلىپ وتىرعانىن جازدى: - اۋىرعان جانە ولارمەن قارىم-قاتىناستا بولعانداردى تەگىن مەديتسينالىق كومەكتىڭ كەپىلدىك بەرىلگەن كولەمى اياسىندا بيۋدجەت قاراجاتى ەسەبىنەن؛ - جۇمىس ىستەيتىن جانە ساقتاندىرىلعان تۇرعىنداردى مىندەتتى الەۋمەتتىك مەديتسينالىق ساقتاندىرۋ جۇيەسى ەسەبىنەن ارنايى كەستە بويىنشا؛ - قالعاندارى - اقىلى.

«تاياۋ بولاشاقتا جۇمىس ىستەيتىن ازاماتتىڭ تۇراقتى جوسپارلى تەستىلەۋدەن ءوتۋى نورماعا اينالاتىن سياقتى. جيىلىگى - جۇمىس سيپاتىنا جانە ءوندىرىستىڭ ەپيدەميولوگيالىق قاۋپىنە بايلانىستى. بۇل ارنايى الگوريتم - كەستە بولماق. ول قازىرگى ۋاقىتتا الەمنىڭ كوپتەگەن ەلدەرىندە تالقىلانىپ جاتىر. ءبىراق، بۇل ازاماتتاردىڭ باسىم بولىگىنە قاۋىپسىزدىكتە بولۋعا، ەلدە جانە الەمدە ساياحاتتاۋعا مۇمكىندىك بەرەدى»، - دەدى ەلجان ءبىرتانوۆ.

اۆتور: مارلان جيەمباي