اتىراۋدا كارانتين رەجيمى جەڭىلدەتىلدى
ورتالىق كوممۋنيكاتسيالار قىزمەتىنىڭ وڭىرلىك فيليالىنىڭ حابارلاۋىنشا، مەملەكەت باسشىسىنىڭ «قازاقستان رەسپۋبليكاسىنداعى توتەنشە جاعدايدى ۇزارتۋ تۋرالى» 2020-جىلعى 27- ساۋىردەگى مالىمدەمەسىنە سايكەس، اتىراۋ وبلىسىنىڭ باس مەملەكەتتىك سانيتارلىق دارىگەرى رۇقسات ەتىلگەن قىزمەت تۇرلەرىنىڭ تىزبەسىن كەڭەيتۋگە قاتىستى قاۋلى شىعارعان.
«اتاپ ايتقاندا، ەندى وڭىردە تەك ازىق-تۇلىك تاۋارلارىن ساتاتىن ساۋدا نۇكتەلەرىمەن قوسا، اۋىلشارۋاشىلىق تەحنيكالارى، قۇرال-جابدىقتار، تىڭايتقىشتار جانە تۇقىمدار ساتاتىن دۇكەندەر دە اشىلادى. سونىمەن قاتار، ونەركاسىپتىك كاسىپورىندار جۇمىسىن جالعاستىرادى. ونىڭ ىشىندە قۇرىلىس جانە جول قۇرىلىسى سالاسىنداعى كومپانيالار، ءىرى قۇرىلىس دۇكەندەرى مەن كولىك، قويما، اۋىلشارۋاشىلىق قىزمەت كورسەتۋ سالاسىنداعى كومپانيالارعا قىزمەتىن قايتا باستاۋعا رۇقسات ەتىلدى. اۆتوسالوندار، قىزمەت كورسەتۋ ستانتسيالارى، اۆتوجۋۋ، شينالارعا قىزمەت كورسەتۋ، اۆتو بولشەكتەر ساتاتىن دۇكەندەر، حيميالىق تازارتقىشتار، تۇرمىستىق جانە ورگتەحنيكانى جوندەۋ، نوتاريالدىق قىزمەتتەر مەن شتاتتىڭ %50 رۇقسات ەتىلگەن ەكىنشى دەڭگەيدەگى بانكتەر دە قىزمەتىن جالعاستىرادى. بۇدان بولەك، كەشكى ساعات 21:00 گە دەيىن جەتكىزۋ قىزمەتى بار تاماقتاندىرۋ ورىندارى جۇمىس ىستەيدى» دەلىنگەن قاۋلىدا.
بۇل نىساندار جۇمىستى قايتا باستاۋ ءۇشىن بارلىق سانيتارلىق-ەپيدەميولوگيالىق تالاپتاردى قاتاڭ ساقتاۋعا مىندەتتەلەدى. سانيتارلىق تازارتقىشتاردىڭ، مەديتسينالىق بەتپەردەلەر مەن قولعاپتار سەكىلدى قورعانىش زاتتارى بولۋى قاجەت. وعان قوسا، جۇمىس ورنىندا تاماقتانۋعا تىيىم سالىنادى.
ال، وبلىس تۇرعىندارى تۇرعىلىقتى مەكەنجايى نەمەسە جۇمىس ورنىنا جاقىن ورنالاسقان اتالعان نىساندارعا بارا الادى. ءالى دە ءىرى ساۋدا-ويىن-ساۋىق ورتالىقتارىنىڭ، بازارلاردىڭ، كينوتەاترلاردىڭ، مونشا كەشەندەرىنىڭ، كومپيۋتەرلىك كلۋبتاردىڭ، فيتنەس-ورتالىقتاردىڭ، تۇرمىستىق تەحنيكا دۇكەندەرىنىڭ، كيىم-كەشەك دۇكەندەرىنىڭ جانە ادامدار كوپ جينالاتىن باسقا دا ورىنداردىڭ قىزمەتىنە تىيىم سالىنعان.
سونداي-اق، قالا كوشەلەرىندە تۇرعىنداردىڭ سەبەپسىز جۇرۋىنە بولمايدى. ال، كوگالداندىرۋ ايماعى بار جانە ساياجاي يەلەرى ءوز ۋچاسكەلەرىنە سەنبى مەن جەكسەنبى كۇندەرى تاڭەرتەڭگى ساعات 06:00 دەن 09:00 گە، كەشكى 17:00 دەن 20:00 گە دەيىن بارىپ-كەلۋگە رۇقسات ەتىلەدى.
