كوروناۆيرۋستى انىقتايتىن تەست جۇيەلەرى ەلىمىزدە دە جاسالادى
وتاندىق پرەپاراتتىڭ ساپاسى شەتەلدىك بالاماسىمەن بىردەي. ەسەسىنە باعاسى قولجەتىمدى. كوروناۆيرۋستى انىقتاۋدىڭ ەڭ ءتيىمدى ءادىسى پتر دەپ اتالادى. ياعني پوليمەرازدى تىزبەكتى رەاكتسيا دەگەن ءسوز. ول ناۋقاس ادامنىڭ نەمەسە سول ناۋقاستارمەن بولعان ازاماتتاردىڭ اۋىز، مۇرىن قۋىسىنان الىنعان جاعىندىلاردى زەرتتەۋ ارقىلى جاسالىنادى. قازاقستاندىق عالىمدار ويلاپ تاپقان ءبىر تەست- جۇيەسى سونداي 50 تالداۋ جاساۋعا جەتەدى. ورتالىق عالىمدارىنىڭ بۇل سالادا تاجىريبەسى جەتكىلىكتى. ولار 2012 -جىلدان بەرى ءسىبىر جاراسى، سارىپ، تىرىسقاق، وبا اۋرۋىنا ارنالعان تەست- جۇيەلەردى جاساپ كەلەدى. ال الەمدە COVID-19 بويىنشا ەپيدەميولوگيالىق جاعداي شيەلەنىسكەن سوڭ كوروناۆيرۋستى انىقتايتىن پوليمەرازدى تىزبەكتى رەاكسيا تەست- جۇيەسىن جاساۋدى قولعا العان.
ايگۇل ءابدىراسىلوۆا، م. ايقىمبايەۆ اتىنداعى اسا قاۋىپتى ينفەكتسيالار ۇ ع و جەتەكشى عىلىمي قىزمەتكەرى:
- قازىرگى تاڭدا بىزدە 10 مىڭ زەرتتەۋگە ارنالعان تەست- جۇيەسى شىعارىلدى. تەست جۇيەلەردىڭ وزىنە تاندىلىگى، سەزىمتالدىلىعى جاعىنان الەمدىك ستاندارتتارعا ساي ەكەندىگى انىقتالدى. كوممەرتسيالىق پرەپاراتتاردان كەم ەمەس ەكەندىگى انىقتالدى. بۇگىنگى تاڭدا اسا قاۋىپتى ينفەكسيالار ۇلتتىق عىلىمي ورتالىعىندا ناۋقاستاردان جانە اۋرۋحانالاردىڭ پالاتالارىنان الىنعان 3 مىڭعا جۋىق سىناماعا زەرتتەۋ جاسالىپتى.
تەست- جۇيە ءوزىنىڭ ءتيىمدى ەكەنىن دالەلدەدى دەيدى جوبا اۆتورلارى. وتاندىق دياگنوستيكالىق پرەپاراتتىڭ تاعى ءبىر ءتيىمدى جاعى - ول ونىڭ باعاسى.
ايگۇل ءابدىراسىلوۆا، م. ايقىمبايەۆ اتىنداعى اسا قاۋىپتى ينفەكسيالار ۇ ع و جەتەكشى عىلىمي قىزمەتكەرى:
- ءبىر تەست- جۇيەگە 116 تەڭگە كەتەدى. سوندا ءوز باعاسى 116 مىڭ تەڭگە بولىپ تۇر. ءبىز باسىندا ءوزىمىزدىڭ شىعارعان تەست- جۇيەنى سالىستىرمالى تۇردە تەكسەرۋ ءۇشىن فيرمالار بىزگە ءبىر ۆەكتوردىڭ تەست- جۇيەسى 1037000 تۇرادى دەپ كوممەرتسيالىق ۇسىنىس جاسادى. گەرمانيادا شىعارىلعان تەست- سيستەمالار 900 مىڭ تۇرادى دەدى. قازىردىڭ وزىندە قازاقستاندىق ونىمگە ءۇندىستان تاراپى قىزىعۋشىلىق ءبىلدىرىپ وتىر.
اسا قاۋىپتى ينفەكسيالار ۇلتتىق عىلىمي ورتالىعىنىڭ باسشىلىعى جۋىردا تاعى ءبىر سەحتىڭ اشىلاتىنىن ايتتى. ەگەر ەكىنشى سەح ىسكە قوسىلسا، ايىنا 200 مىڭعا دەيىن اناليزدى زەرتتەۋگە جەتەتىن تەست- جۇيە جاساۋعا بولادى.
