قازاقستان كارانتين رەجيمىن جەڭىلدەتۋگە دايىن با
بۇل تۋرالى ق ر پرەزيدەنتى قاسىم-جومارت توقايەۆتىڭ مالىمدەمەسىندە ايتىلعان، دەپ حابارلايدى قازاقپارات ءتىلشىسى.
ق ر پرەزيدەنتى توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيا كارانتين تالاپتارىن جەڭىلدەتۋگە دايىن ەكەندىگىن ايتتى.
«الدىمەن، ۆيرۋستىڭ تارالۋىن قاتاڭ باقىلاۋدا ۇستاپ وتىرعان وبلىستار مەن قالالاردان باستاۋعا بولادى. مەملەكەتتىك كوميسسياعا ەلوردانىڭ ۇلگىسىمەن ەلىمىزدىڭ بارلىق ايماعىندا ءوز جۇمىستارىنا كىرىسەتىن مەكەمەلەردىڭ ءتىزىمىن جاساۋ تاپسىرىلدى. ءبىرىنشى كەزەكتە ونەركاسىپ كاسىپورىندارى، قۇرىلىس، جول قۇرىلىسى جانە كولىك كومپانيالارى، بانكتەر جانە حالىققا قىزمەت كورسەتۋ ورتالىقتارى جۇمىسقا كىرىسۋى كەرەك»، - دەدى مەملەكەت باسشىسى.
قاسىم-جومارت توقايەۆ ءبىراق بارلىق سانيتارلىق نورمالاردى ساقتاپ، جۇمىس ورىندارىندا ۇنەمى دەزينفەكتسيا جۇرگىزىپ تۇرۋ قاجەتتىگىن، كۇندەلىكتى ومىردە الەۋمەتتىك ارا قاشىقتىقتى ۇستانعان ءجون ەكەندىگىن باسا اتاپ وتەدى.
«كاسىپورىن باسشىلارىنا جانە جەرگىلىكتى اتقارۋ ورگاندارىنا جەكە جاۋاپكەرشىلىك جۇكتەلەدى. بۇل ورايدا بارلىق دەڭگەيدەگى اكىمدىكتەردىڭ ءرولى ايتارلىقتاي ارتادى»، - دەدى ق ر پرەزيدەنتى.
اۆتور: مارلان جيەمباي
