قازاقستان ىندەتتىڭ شارىقتاۋ شەگىنەن ءالى وتكەن جوق - توقايەۆ
بۇل تۋرالى ق ر پرەزيدەنتى قاسىم-جومارت توقايەۆتىڭ مالىمدەمەسىندە ايتىلعان، دەپ حابارلايدى قازاقپارات ءتىلشىسى.
«قول جەتكىزگەن ناتيجەمەن شەكتەلۋگە بولمايدى. قالىپتاسقان احۋال ءالى دە كۇردەلى. كوروناۆيرۋس بۇكىل الەمدى جايلاپ كەلەدى. ۆيرۋس جۇقتىرعانداردىڭ سانى 3 ميلليونعا جۋىقتادى. بۇل كورسەتكىش ءوسىپ بارا جاتىر. پاندەميانىڭ ەكىنشى كەزەڭى باستالىپ كەتۋى دە ىقتيمال. قازاقستان ىندەتتىڭ شارىقتاۋ شەگىنەن وتكەن جوق. احۋالدىڭ باقىلاۋدان شىعىپ كەتۋ قاۋپى بار»، - دەدى قاسىم-جومارت توقايەۆ.
مەملەكەت باسشىسىنىڭ اتاپ وتۋىنشە، وكىنىشكە قاراي، كەيبىر ايماقتاردا، اسىرەسە، الماتىدا ۆيرۋس جۇقتىرعان دارىگەرلەر جانە مەديتسينا قىزمەتكەرلەرى وتە كوپ.
«سوندىقتان، سولاردىڭ قاۋىپسىزدىگىن قامتاماسىز ەتۋ ءۇشىن شۇعىل شارالار قابىلدانۋدا. ماسەلەنىڭ انىق-قانىعىن زەرتتەپ، بۇعان جول بەرگەن باسشىلاردىڭ جاۋاپكەرشىلىگىن قاراۋ كەرەك. مۇنداي جاعدايلارعا جول بەرمەۋ قاجەت. قاۋىپسىزدىك شارالارىن قاتاڭ ساقتاعان ءجون. ونسىز بولمايدى. ولاي ەتپەسەك، ىندەتتىڭ جاڭا وشاقتارى پايدا بولۋى مۇمكىن»، - دەدى ق ر پرەزيدەنتى.
