پرەزيدەنت: شىنايى اقپارات تاراتىپ جۇرگەن جۋرناليستەر قاۋىمىنا العىس ايتامىن
بۇل تۋرالى ق ر پرەزيدەنتى قاسىم-جومارت توقايەۆتىڭ مالىمدەمەسىندە اتالىپ ءوتتى، دەپ حابارلايدى قازاقپارات.
«ىندەتپەن كۇرەستىڭ الدىڭعى شەبىندەگى ازاماتتاردى تاعى دا ەرەكشە اتاپ وتكىم كەلەدى. حالىقتىڭ قاۋىپسىزدىگى ءۇشىن جانكەشتىلىك تانىتىپ جۇرگەن دارىگەرلەر مەن مەديتسينا قىزمەتكەرلەرىنە، قۇقىق قورعاۋ ورگاندارىنىڭ وكىلدەرىنە جانە اسكەري قىزمەتشىلەرگە العىس ايتامىن. قاۋىپ-قاتەرگە قاراماي مۇقتاج جاندارعا كومەك قولىن سوزعان ۆولونتەرلەرگە دە ريزاشىلىق بىلدىرەمىن. سونداي-اق، حالىققا جەدەل جانە شىنايى اقپارات تاراتىپ جۇرگەن جۋرناليستەر قاۋىمىنا العىس ايتامىن»، - دەدى پرەزيدەنت.
سونىمەن قاتار مەملەكەت باسشىسى داعدارىسقا قارسى شارالاردى جۇزەگە اسىرۋعا اتسالىسقان مەملەكەتتىك اپپاراتتىڭ قىزمەتكەرلەرى دە قۇرمەتكە لايىق ەكەنىن اتاپ ءوتتى.
«قازاقستان حالىقارالىق قوعامداستىقتان ەش نارسەنى جاسىرماي، بارلىق مالىمەتتى اشىق جاريالاپ وتىر. سوندىقتان كەيبىر ازاماتتاردى بوس ءسوز بەن جالعان مالىمەتكە جول بەرمەۋگە شاقىرامىن. ارينە، مەملەكەتتىك ورگانداردىڭ جۇمىسىندا ولقىلىقتار بار، ءبىراق، مەملەكەتتىك قىزمەتشىلەردىڭ كوپشىلىگى جۇمىسىن ادال اتقارۋدا. كەمشىلىكتەردى ءبىز كورىپ وتىرمىز. ودان ءتيىستى ساباق الىپ، قاجەتتى شارالاردى قابىلدايمىز»، - دەدى قاسىم-جومارت كەمەل ۇلى.
«بۇل داعدارىس بىرلىگى بەكەم، ەلىن سۇيەتىن وتانشىل جۇرت ەكەنىمىزدى كورسەتتى. قاشاندا وسىلاي ۇلت بولىپ ۇيىسا بىلسەك، بارلىق ماقساتىمىزعا قول جەتكىزەمىز. وعان ەشقانداي كۇمان جوق. ەلدىڭ قامى ءۇشىن باستاعان ءىسىمىز قايىرلى بولادى دەپ سەنەمىن! حالقىمىز «بەرەكە باسى - بىرلىكتە» دەيدى. جۇدىرىقتاي جۇمىلساق، كەز كەلگەن قيىندىقتى جەڭەمىز! ءبىز بىرگەمىز!»، - دەدى پرەزيدەنت مالىمدەمەسىندە.
