كوروناۆيرۋستان قالاي قورعانۋعا بولادى - پۋلمونولوگ كەڭەسى
بۇل تۋرالى مەديتسينا عىلىمدارىنىڭ دوكتورى، پروفەسسور ساۋلە قاسەنوۆا ايتتى، دەپ حابارلايدى قازاقپارات ءتىلشىسى.
«ەگدە ادامدار ۆيرۋس ينفەكسياسىن اۋىر كوتەرەدى جانە وسىنىڭ سالدارىنان بولاتىن جاعىمسىز بولجام بار. وكپەنىڭ سوزىلمالى وبسترۋكتيۆتى اۋرۋى، برونح دەمىكپەسى، وكپەنىڭ ينتەرستيتسيالدىق اۋرۋلارى سياقتى تىنىس الۋ جولدارىنىڭ سوزىلمالى اۋرۋلارى بار پاتسيەنتتەر ءبىرىنشى كەزەكتە «تاۋەكەل توبىندا» بولادى، سەبەبى ولاردىڭ تىنىس الۋ جۇيەسىنىڭ ۆيرۋستىق جۇكتەمەگە قارسىلاسۋ قابىلەتى وتە تومەن»، - دەيدى كارديولوگيا جانە ىشكى اۋرۋلار عىلىمي- زەرتتەۋ ينستيتۋتىنىڭ جوعارى ءبىلىم الۋدان كەيىنگى جانە قوسىمشا ءبىلىم بەرۋ دەپارتامەنتىنىڭ باسشىسى ساۋلە كاسەنوۆا.
پۋلمونولوگ دارىگەر دەنساۋلىققا مۇقيات قاراۋ كەرەك ەكەنىن، ول ءۇشىن تومەندەگى كەڭەستەردى نازاردا ۇستاۋ كەرەكتىگىن ايتتى.
- دۇنيە جۇزىندە ءوزىنىڭ تيىمدىلىگىن كورسەتكەن كارانتين شارالارىن ورىنداۋ قاجەت؛
- دۇكەنگە اپتاسىنا 2 رەت تەك قانا قاجەتتى ازىق- تۇلىككە شىعۋ كەرەك؛
- قوقىستى مەيلىنشە باسقا ادامدارمەن قارىم- قاتىناستىڭ بولۋ مۇمكىندىگى از ۋاقىتتا - تاڭەرتەڭ ەرتە نەمەسە كەشكى ۋاقىتتا شىعارعان دۇرىس؛
- تەلەديداردى كۇنىنە تەك قانا قاجەتتى اقپاراتتى الۋ ءۇشىن 2 ساعات قانا كورگەن دۇرىس؛
- تىنىس الۋ جولدارىنىڭ ەپيتەليالىق جاسۋشالارىن قورعايتىن ا، ە جانە س دارۋمەندەرىن قابىلداۋ قاجەت؛
- گيگيەنا شارالارىن ورىنداۋ كەرەك. ونىڭ ايتۋىنشا، وقشاۋلانۋ كوپ ۋاقىتتى وتباسى مۇشەلەرىمەن بىرگە وتكىزۋگە مۇمكىندىك بەرەدى.
«سترەستى ءوز بەتىنشە جەڭىپ شىعا المايتىن جالعىزباستى ەگدە ادامداردى، بالالاردى، جاسوسپىرىمدەردى قولداڭىزدار. نەگاتيۆتى سترەسس ادام يممۋنيتەتىنە كەرى اسەر بەرەتىندىكتەن ۇرەيلى كوڭىل-كۇيدەن الشاق بولىڭىزدار. زياندى ادەتتەردەن، اسىرەسە تەمەكى شەگۋ، جاستار ىشىندە پايدا بولعان ەلەكتروندى سيگارەتتەر مەن كاليان شەگۋدەن باس تارتۋدىڭ ۋاقىتى كەلدى. قاۋىپتى ۋاقىت تا بىتەدى، ءومىر دە ءوز قالپىنا كەلەدى، ول ءۇشىن ءوزىڭىزدىڭ جانە ءسىزدى قورشاعان ادامداردىڭ دەنساۋلىعىن ساقتاۋ قاجەت»، - دەيدى ول.
اۆتور: زارينا قاھارمان
